ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Աշոտ Խոեցյանը՝ ՀՊՄՀ ռեկտորի ժամանակավոր պաշտոնակատար
26.08.2021
Աշոտ Խոեցյանը՝ ՀՊՄՀ ռեկտորի ժամանակավոր պաշտոնակատար

Այսօր Մանկավարժական համալսարանում կայացավ ռեկտորատի ընդլայնված նիստ, որին ներկա էին նաև Կրթության, գիտության, սպորտի և մշակույթի նախարար Վահրամ Դումանյանը և նախարարի տեղակալ Կարեն Թռչունյանը:

«Հիմնադրամների մասին» ՀՀ օրենքի համաձայն, Արդարադատության նախարարի հրամանով վերջերս ձևավորվել է 3 հոգանոց ժամանակավոր խորհուրդ, որն էլ նշանակեց ՀՊՄՀ-ի ռեկտորի ժամանակավոր պաշտոնակատարին:

Պաշտոնակատարը աշխարհագրական գիտությունների դոկտոր, պրոֆեսոր Աշոտ Խոեցյանն է։ Վերջինս նաև բուհի Աշխարհագրության և նրա դասավանդման մեթոդիկայի ամբիոնի վարիչի պաշտոնակատարն էր։

ԿԳՄՍ նախարար Վահրամ Դումանյանը, ներկայացնելով նորանշանակ ռեկտորի ժամանակավոր պաշտոնակատարին, ընդգծեց վերջինիս պրոֆեսիոնալիզմն ու սկզբունքայնությունը` հույս հայտնելով, որ նրա շնորհիվ իր ղեկավարծ ոլորտում կլուծվեն մի շարք խնդիրներ:

Աշոտ Խոեցյանը շնորհակալություն հայտնեց վստահության համար և ներկայացրեց բուհի կրթական զարգացման ու առաջիկա գործունեության իր տեսլականը:

ԵՊՀ-ում 28, ՀՊՄՀ-ում 8 տարի աշխատած, դեկանի և ամբիոնի վարիչ պաշտոններ զբաղեցրած, միջազգային հեղինակավոր կազմակերպություններին անդամակցող և բազմաթիվ հրապարակումների հեղիանակ աշխարհագրագետ-գիտնականն իր ելույթում կարևորեց Մանկավարժականում ձևավորված մարդկային փոխհահարբերությունների, ինչպես նաև նախկին ղեկավարի օրոք ձևավորված բարեխիղճ աշխատանքի, բարոյահոգեբանական մթնոլորտի պահպանումն ու փոխանցումը:

Աշոտ Խոեցյանը նկատեց՝ պետք է քայլել համաշխարհային զարգացումներին համընթաց՝ միաժամանակ դիմակայելով դարի և կրթության ոլորտի մարտահրավերներին.«Հետագա քայլերը պահանջելու են ժամանակ, աշխատակազմի հետ միասնական, նվիրված աշխատանք: Կստեղծվի հավակնոտ թիմ և թիմային ուժերով խնդիրներին կտրվեն պատշաճ լուծումներ: Մեր կարևոր խնդիրը, որպես ապագա մանկավարժներ պատրաստող առաջատար բուհ, այդ կարգավիճակի պահպանումն ու ամրապնդումն է»,-հավելեց նա:

Հանդիպման ընթացքում ԿԳՄՍ նախարար Վահրամ Դումանյանը, շնորհակալություն հայտնեց բուհի նախկին ռեկտոր, պրոֆեսոր Ռուբեն Միրզախանյանին, կատարած հսկայական աշխատանքի համար՝ ընդգծելով վերջինիս կարևոր դերակատարումը բուհի գիտակրթական զարգացման գործում: Ռուբեն Միրզախանյանի պաշտոնավարման ժամկետն ավարտվել էր ընթացիկ տարվա հունիսին:

Նախարարն անդրադարձավ «Բարձրագույն կրթության և գիտության մասին» ՀՀ օրենքում տեղ գտած որոշ դրույթներ հակասահմանադրական ճանաչելու վերաբերյալ սկիզբ առած գործընթացներին և ընդգծեց, որ դա տևական ժամանակ լուրջ խոչընդոտներ է առաջացրել մի քանի բուհերում ռեկտոր ընտրելու հարցում: 

Նախարարի՝ ուսուցիչը նախևառաջ պետք է լավ մասնագետ լինի հարցադրմանը ՀՊՄՀ պրոռեկտոր, հոգեբանական գիտությունների դոկտոր, պրոֆեսոր Սրբուհի Գևորգյանը նշեց, որ ուսուցիչը պետք է անպայման ունենա մանկավարժահոգեբանական որակներ, առանց որի հնարավոր չէ դասավանդել որևէ մասնագիտություն:

Հանդիպման ընթացքում Հայ նոր և նորագույն գրականության ամբիոնի վարիչ, Սփյուռք գիտաուսումնական կենտրոնի տնօրեն, բանասիրական գիտությունների դոկտոր, պրոֆեսոր Սուրեն Դանիելյանն էլ խոսեց մագիստրատուրայում արևմտահայ դասընթաց ներմուծելու անհրաժեշտության մասին։

«Մանկավարժությունն ամեն ինչ է, այն ստրատեգիական ուղղություն է: Կրթական համակարգում առկա են բազմաթիվ խնդիրներ.ես պատասխանատու եմ, որ բուհերում ստեղծվի պատշաճ աշխատանքային միջավայր, իսկ իրավական ոլորտում առկա հարցերը կեղծ օրակարգ են: Նախարար, թե ռեկտոր, չպետք է խանգարեն աշխատողին, այլ աջակցեն միասնական իրականացնել կրթական զարգացումերի ճանապարհին հանդիպող խնդիրները»,-հավելեց Վահրամ Դումանյանը: