ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Ավարտական դիպլոմներ՝ մագիստրոսներին
07.03.2022
Ավարտական դիպլոմներ՝ մագիստրոսներին

ՀՊՄՀ ռեկտորի ժամանակավոր պաշտոնակատար Սրբուհի Գևորգյանն այսօր պետական ավարտական գերազանցության դիպլոմներ հանձնեց 2021-22 ուսումնական տարվա հեռակա ուսուցման համակարգի 13 մագիստրոսի. շրջանավարտների ընդհանուր թիվն այս տարի 80-ն է:

Սրբուհի Գևորգյանը  շնորհավորեց  հիշարժան օրվա առթիվ՝ ընդգծելով, որ  դիպլոմների հանձնման արարողությունը բուհի համար մշտապես եղել և մնում է կարևոր իրադարձություն. «Մասնագիտական որոշակի ուղերձով ճանապարհում ենք մեր գործընկներին, որոնք կրթական հաստատություններում տարբեր մասնագիտությունների գծով ներկայացնելու են բուհը՝  ձեռնամուխ  լինելով լուծել  ոլորտի մի շարք խնդիրներ:  Սպասում ենք նոր ձեռագրաբանության, մեթոդաբանական մոտեցումների և համոզված ենք՝ որակական առումով գերազանցելու եք մինչև ձեզ արած նախորդ բոլոր փորձերը»,-նշեց բուհի ռեկտորը՝ շրջանավարտներին մաղթելով նոր մղումներով ոգեշնչված հաջողոթյուններ:

Ուսումնական գործընթացների գծով նորանշանակ  պրոռեկտոր Նաիրա Սաֆարյանն էլ հավելեց` դիպլոմների հանձնման օրը պատահական չէ ընտրված. միամսյակի մեկնարկն ու  տոնական տրամադրությունը թող շրջանավարտներին  ուղեկցի ողջ կյանքի ընթացքում:

Գերազանցության դիպլոմով Մանկավարժական համալսարանն այս տարի ավարտեց նաև Լոս Անջելեսի բնակիչ, Մարի Մանուկյան-Դեմիրճյան վարժարանի ուսուցիչ Անի Քեշիշյանը:

2017 թվականին Հայաստանում մասնակցել է սփյուռքահայ ուսուցիչների վերապատրաստման ծրագրին, ապա որոշել կրթությունը շարունակել ՀՊՄՀ-ի Բանասիրական ֆակուլտետում:

Ինչպես Անին է ասում՝ տարածությունը չխանգարեց. կանաչ լույսն այդ օրվանից վառվեց, իսկ այսօր արդեն բարձր տրամադրությամբ  իր ձեռքբերումն  է տոնում պրոֆեսորադասախոսական կազմի  և ընկերների հետ:

Հայոց լեզվի և գրականության սփյուռքահայ  ուսուցչուհին տպավորված է դասախոսների հմտություններից և բուհում  ստացած  իր կրթությունից. կարծում է, որ  Սփյուռքը պետք է անմիջական մասնակիցը լինի հայրենիքի զորացմանը, իսկ ինքը կանի հնարավոր ամեն ինչ՝ լեզուն և գրականությունը  հայրենիքից դուրս տարածելու համար:

«Հավերժ ուսանող» Լիլիթ Գրիգորյանն արդեն 17 տարի Մանկավարժականի ուսանող է: Սկզբում  նախադպրոցական մանկավարժություն և հոգեբանություն, ապա հոգեբանություն և մանկավարժություն, իսկ այսօր արդեն տարրական մանկավարժություն և մեթոդիկա մասնագիտությունը ձեռք բերած շրջանավարտն  անկեղծանում է՝  ուսուցիչ դառնալու երազանքն այլևս  իրականություն է:

Երևանի Ռաֆայել Իշխանյանի անվան համար 153 հիմնական դպրոցի դասվարին այլևս ոչինչ չի խանգարում զբաղվել սիրելի մասնագիտությամբ և ստանձնել ուսուցչի վեհ առաքելությունը: