- Հայ
- Рус
- Eng
Ապրիլի 7-ը՝ Մայրության և գեղեցկության տոնը, Մանկավարժական համալսարանում նշանավորվեց «Ճախրուկ» էթնո երաժշտախմբի համերգով։
Երաժշտախմբում նվագում և երգում են Խարբերդի մասնագիտացված մանկատան հատուկ կարիքներ ունեցող սաները․ այն հիմնել են Աննա և Անահիտ Մխիթարյանները։
ՀՊՄՀ-ի Աշխատակազմի և միջազգային համագործակցության գծով պրոռեկտոր Մարիաննա Հարությունյանը մեծ պատիվ և խորհրդանշական համարեց, որ այս կարևոր օրը «Ճախրուկ»-ն անցկացնում են աբովյանականների հարկի ներքո։
Պրոռեկտորը նշեց՝ սաները վաղուց հարազատ են դարձել․ անհամբեր են և մշտապես պատրաստ են հյուրընկալել նրանց։ Վստահ է՝ «Ճախրուկ»-ներն իրենց արվեստով կոգեշնչեն, և դրական հույզեր կպարգևեն ներկաներին, նաև մտածելու առիթ կտան։
Համերգային ծրագրում ազգային, աշուղական, հոգևոր երգ-երաժշտություն էր․եղան յուրատեսակ կատարումներ։ Ցուցադրվեց նաև փոքրիկ վավերագրական ֆիլմ, որտեղ ներկայացված էր «Ճախրուկ»-ների կյանքը․ ինչպես են ապրում, մտածում, արարում նաև երաժշտական այն աշխարհը, որ միասին են ստեղծվել՝ երկարատև աշխատանքի արդյունքում։
«Ճախրուկ»-ի հիմնադիր Անահիտ Մխիթարյանը շնորհակալություն հայտնեց ջերմ հանդիպման համար, շնորհավորեց տոնի առթիվ և խոստովանեց՝ Մանկավարժականը հարազատ բուհ է դարձել «Ճախրուկ»-ի սաների համար։ Նա կրթօաջախին սիրով նվիրեց սաների հեղինակած ձեռագործ սպասք։
