Մարտի 11-ին Մանկավարժական համալսարանի գիտական գրադարանի հումանիտար գրականության ընթերցասրահում կայացավ «Չորեքշաբթի» գրական ակումբի 202–րդ հանդիպումը:
4 տարի առաջ չորեքշաբթի օրը ՀՊՄՀ-ում ստեղծվեց գրական ակումբը եւ կոչվեց «Չորեքշաբթի»:
Գրադարանի տնօրեն, ակումբի հիմնադիր, «Զորավար» հիմնադրամի նախագահ Տիգրան Պետրոսյանցը ներկայացրեց 2013-ին հիմնադրված ակումբի ստեղծման նպատակը, գործունեությունը, անելիքներն ու ձեռքբերումները: Վերջինս նկատեց, որ կան մի շարք ակումբներ, որոնք չեն դիմանում ժամանակի փորձությանն ու լուծարվում են: Պատճառը, ըստ ակումբի հիմնադիրի, մարդկային ամբիցիաներն են.««Չորեքշաբթի»-ն ապրեց ու հաղթահարեց իր ծննդյան դժվարությունները: Այս ընթացքում տպագրվել է 4 գիրք, որոնք իրենց մեջ ամփոփել են 200-ից ավելի մարդկանց ստեղծագործություններ»:
Տիգրան Պետրոսյանցը նշեց նաև, որ ակումբի հիմնադրման օրերին առանցքը ՀՊՄՀ-ն էր, սակայն ժամանակի ընթացքում պարզ դարձավ՝ միայն մի կառույցի վրա չպետք է հիմնվել, եւ այն դարձրին հայաստանյան կառույց. «Մենք կառույց ստեղծեցինք նաեւ Արցախի համալսարանում, կապ հաստատեցինք Էջմիածնի Գեւորգյան ճեմարանի հետ: Սա գրական հարթակ է ստեղծագործող երիտասարդների համար, որի նպատակն է նրանց զինել ազգայի արժեքներով, զարգացնել երիտասարդների ստեղծագործական հնարավորությունները»:
Ակումբի տարեդարձին ներկա էին ՀՊՄՀ-ի պրոֆեսորադասախոսական կազմը, ուսանողներ, ստեղծագործողներ, ասմունքողներ, երաժիշտներ, հոգևորականներ:
Միջոցառման ընթացքում կայացավ «Չորեքշաբթի Դ» հատորի, ինչպես նաև երկու այլ գրքերի շնորհանդես, եղան շնորհավորանքներ, ելույթներ, վկայականների հանձնում, ասմունք, երգ, պար:
«Ստեղծագործական ժամացույց» բաժնում իրենց նոր ստեղծագործությունները ներկայացրին ակումբի մի շարք անդամներ.դրանց շուրջ ծավալվեց քննարկում:
«Մշակութային լուսանցք» բաժնում ընթերցվեցին ակումբի անդամների հեղինակած բանաստեղծությունները:
Ստեղծման օրից առ այսօր «Չորեքշաբթի» գրական ակումբն ամեն շաբաթ կազմակերպում է հանդիպում-քննարկումներ.մինչ օրս կայացել է 201 հանդիպում: Ակումբում ընդգրված են երիտասարդներ տարբեր շրջաններից. այն ունի 200-ից ավելի անդամ՝ Հայաստանից, Արցախից, Ռուսաստանից:
«Չորեքշաբթի» գրական ակումբ են հաճախում նաեւ ուսանողներ Գանայից ու Սուդանից.նրանք Դիլիջանի միջազգային դպրոցի սաներ են: