Քաղաքային գեղեցիկ տեսարաններ, բնապատկերներ, ինքնատիպ մշակույթ. նման լուսանկարներով էր ներկայացված Կրասնոյարսկ երկրամասն ու համանուն քաղաքը՝ Մանկավարժական համալսարանի Գեղարվեստական կրթության ֆակուլտետի նախասրահում բացված ցուցահանդեսում:
Ռուսաստանի գիտության և մշակույթի կենտրոնի նախաձեռնությամբ կազմակերպված ձեռնարկն իրականացվում է սպորտային միջազգային իրադարձության՝ Կրասնոյարսկում կայանալիք 29-րդ ձմեռային Ունիվերսիադայի շրջանակներում:
Մանկավարժական համալսարանի Ուսումնագիտական գծով պրոռեկտոր Սրբուհի Գևորգյանը ողջունեց հյուրերին և կարևորեց նման միջոցառման անցկացումը համատեղ գործունեություն ծավալելու տեսանկյունից:
Երևանում Ռուսաստանի գիտության և մշակույթի կենտրոնի մշակութային և հասարակական բաժնի ղեկավար Անդրանիկ Արզումանյանը ևս ողջունեց ներկաներին և ընդգծեց. «Լիահույս ենք, որ ունիվերսիադան ուսանողներին կհետաքրքրի. այն ամենակարևոր սպորտային միջոցառումն է, որ անցկացվում է տարվա ընթացքում մի քանի անգամ՝ հնարավորություն ընձեռելով աշխարհի մի շարք երկրների ուսանողներին ևս մասնակցել»:
Վերջինս հավելեց նաև, որ Հայաստանը նույնպես մասնակցելու է ձմեռային մրցարշավին և հույս հայտնեց, որ հայ մարզիկները Կրասնոյարսկից կվերադառնան մեդալներով: