ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Երթ՝ ի հիշատակ զոհերի ոգեկոչման
19.01.2023
Երթ՝ ի հիշատակ զոհերի ոգեկոչման

Այսօր Մանկավարժական համալսարանի դասախոսական կազմն ու ուսանողները բազմամարդ երթով  մասնակցեցին Սումգայիթում, Բաքվում, Գանձակում  և այլ քաղաքներում հայ ազգաբնակչության դեմ ադրբեջանական իշխանությունների ոճրագործությունների զոհերի ոգեկոչման արարողությանը։

Աբովյանականները  ծաղիկներ խոնարհեցին Ծիծեռնակաբերդի հուշահամալիրի հարևանությամբ գտնվող խաչքարին և մեկ րոպե լռությամբ հարգեցին զոհերի հիշատակը։

Արարողությանը ներկա էին  պաշտոնատար անձինք, այլ բուհերի ներկայացուցիչներ ևս։

1988-1990թթ. ադրբեջանական իշխանություններն  իրականացրին հայերի զանգվածային ջարդ, ինչի  հետևանքով վտարանդի դարձավ Ադրբեջանի հայկական համայնքը։

Երթի մասնակից, ՀՊՄՀ Հայոց պատմության ամբիոնի պրոֆեսոր Սամվել Պողոսյանն ընդգծում է՝ ադրբեջանական իշխանությունների գործողությունը, Սումգայիթի և Բաքվի հայկական ջարդերը, չստացան համարժեք պատասխան, ինչն էլ ոգևորեց ադրբեջանցիներին՝ կազմակերպելու էթնիկ զտում, հայկական այլ տարածքների բնակչության բռնություն, ջարդ և  վտարում։

Պատմաբանը նկատում է՝ Ադրբեջան արհեստածին պետությունը ցեղասպանության միջոցով  վերջին հարյուր տարվա ընթացքում ոչնչացրել է հայ բնակչությանն ու տիրացել Հայաստանի պատմական տարածքին, որը  20-րդ դարի սկզբում բնակեցված էր հայերով։

Պրոֆեսոր Պողոսյանը ցավով է նկատում՝ Ադրբեջանի կազմակերպած և իրականացրած ջարդերը համարժեք քաղաքական և իրավական  գնահատական չստացան, ինչի արդյունքում վերջին 30 տարիների ընթացքում պետական մակարդակով իրականացվում է ցեղասպանական բացահայտ քարոզություն․ «Անպատժելիությունն է, որ ծնում է նման հանցագործություններ։
Ադրբեջանն Արցախում ռազմական հաջողություններ ունենալով և գրավելով  տարածքի 75 տոկոսը,  վտարեց հայ բնակչությանը, իսկ նրանք, ովքեր մնացին՝ սպանվեցին։ Ցավոք, աշխարհն ընտրովի է արձագանքում հանցագործություններին»։ 

Սամվել Պողոսյանը կարծում է, որ պետք է դասեր քաղել անցյալից․ հիշել և հասկանալ՝ ինչ է տեղի ունեցել, ժամանակին արձագանքել և պատրաստ լինել ինքնուրույն դիմակայել նման արհավիրքներին և ողբերգություններին։

Պրոֆեսորը մատնանշեlով ուսանողական բազմամարդ երթն  ընդգծում է՝  այսօրվա ուսանողներն ունեն այդ գիտակցությունը․ այն ամեն օր ամրապնդվում  է Ադրբեջանի կատարած  ցեղասպանական և ռասիստական գործողությունների արդյունքում։

ՀՊՄՀ Ուսանողական խորհրդի նախագահ Պարույր Գալստյանն aspu.am-ի հետ զրույցում հավելեց՝ բուհի շուրջ 350 ուսանող մասնակցում է ոգեկոչման արարողությանն ու դատապարտում Բաքվի և Սումգայիթի ջարդերը։

Ուսանողական կառույցի ղեկավարը կարծում է, որ հայ  երիտասարդները պետք է համախմբված լինեն և հավաքվեն  ազգային գաղափարի շուրջ։

Վերջինս նաև անթույլատրելի է համարում ադրբեջանական իշխանության կողմից Արցախը Հայաստանին կապող միակ ճանապարհի փակումը, ստեղծված հումանիտար աղետը, որի նպատակը նույնն է, ինչ նախկինում՝ հայ էթնոսի վերացում։