ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

«Եթե հաջողություններ ես ունենում աշխատանքիդ մեջ, ուրեմն ազատ ես»
05.05.2018
«Եթե հաջողություններ ես ունենում աշխատանքիդ մեջ, ուրեմն ազատ ես»

Բանասիրական ֆակուլտետի դասախոսներն ու ուսանողները հյուրընկալել էին Սերբիայի Հանրապետության Նովի Սադ քաղաքի համալսարանի բանասիրական գիտությունների դոկտոր, պրոֆեսոր, գրականագետ, արձակագիր Սավա Դամյանովին:

Հայաստանում Սերբիայի Հանրապետության պատվո հյուպատոս, գրող, թարգմանիչ Բաբկեն Սիմոնյանը ներկայացրեց հյուրին և կարևորեց հատկապես օրվա խորհուրդը՝ հանդիպման միջոցով խոսել գրի ու գրքի մասին:

Սերբ պրոֆեսորն այս օրերին այցելել է Հայոց ցեղասպանության հուշահամալիր և ցավով է նկատում, որ շուրջ 5 դար օսմանյան լծի տակ գտնված սերբերը չունեն Ցեղասպանության որևէ հուշակոթող:

Սավա Դամյանովը խոսեց իր անցած ճանապարհի, մասնագիտության, երկրի, սերբ երիտասարդության մասին և պատասխանեց ուսանողների հարցերին:

Սավա Դամյանովի մոտ գրականության հանդեպ սերը մանկուց է ծնվել: Դեռևս 20 տարեկանում զբաղվել է լրագրողական գործունեությամբ, շրջագայել աշխարհի տարբեր երկրներում, հեղինակել բազմաթիվ հրապարակումներ, ապա ընթերցողներին ներկայացել իր գրական ձիրքով ու տաղանդով:

«Երբ մտովի հետ եմ նայում, մտածում եմ՝ լրագրողի ազատությունը ճի՞շտ էր փոխել դասախոսական աշխատանքի հետ: Շուտով հասկանում եմ՝ եթե հաջողություններ ես ունենում աշխատանքիդ մեջ, ուրեմն ազատ ես»,-նշեց պրոֆեսորն ու խոստովանեց, որ իր համար հոգևոր-գրական աշխատանքները շատ ավելի կարևոր են, քան վարձատրությունը:

Հյուրը խոսեց նաև իր երկրի մասին և ցավով նկատեց, որ 21-րդ դարում գլոբալիզացիան մոլորակի վրա աստիճանաբար վերացնում է անհատականությունը, համահարթեցնում ու իրար նմանեցնում ամեն ինչ:

Խոսելով հայ և սերբ ազգերի նմանություններից՝ նա առանձնացրեց հատկապես երկու ժողովուրդների երիտասարդների ազատամտությունը:
Նա անդրադարձավ նաև Նովի Սադ քաղաքի համալսարանի և եվրոպական մի շարք բուհերի հետ գոյություն ունեցող գիտակրթական կապերին և ցանկություն հայտնեց Մանկավարժականի հետ ևս հաստատել համագործակցություն՝ հաշվի առնելով երկու երկրների միջև դեռևս 17-18-րդ դարերից եկող ավանդական, գրական-պատմական, հոգևոր կապերն ու ընդհանրությունները:

«Սերբիայի քաղաքական, մշակութային, հասարակական կյանքում հայերը մեծ հետք են թողել: Երկու ազգերի հավատքում ևս ընդհանուր գծեր կան, ինչն օգնել է հայերին ապրել ու արարել առանց ձուլվելու»,-հավելեց Սավա Դամյանովը:

Հանդիպումը ժամանակ առ ժամանակ ընդմիջվում, ավելի շուտ՝ շաղախվում էր սերբական հրաշալի երգերով, իսկ դահլիճում նստած սերբ երիտասարդ, Գևորգյան ճեմարանի սան Պրեդրագ Միյանովիչը ձայնակցում էր հայրենքի սիրված երգերին: