ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Այս տարվա սկզբին արդեն 12-րդ անգամ ՀՊՄՀ Ուսանողական խորհրդի նախաձեռնությամբ անցկացվեց «Լավագույն ուսանող» ամենամյա մրցանակաբաշխությունը։

Ինչպես նախորդ անգամ, այս տարի նույնպես ֆակուլտետերի 10 լավագույններն ուղևորվեցին Վրաստան՝ անցկացնելու իրենց եռօրյա հանգիստը:

Այցի ընթացքում աբովյանակնները ծանոթացան վրացական մշակույթին, այցելեցին մի շարք պատմամշակութային վայրեր, այդ թվում՝ Սվետիցխովելի եկեղեցի, Բոդբե մենաստան, որտեղ ամփոփված է Սուրբ Նինոյի մարմինը, Սոլոլակի թաղամաս՝ Թումանյանի տուն֊թանգարան, հայ գրողների և հասարակական գործիչների պանթեոն, ունեցան քաղաքային զբոսաշրջություն՝ շրջելով Թբիլիսիի կոլորիտային և նշանակալից փողոցներով, մասնակցեցին նավարկության, երթևեկեցին ճոպանուղով։

Ուսանողները նաև եղան Վրաստանի հնագույն մայրաքաղաք Մցխեթայում, այցելեցին Ջվարիի տաճար, Կախեթիի մարզ, ուղևորվեցին Սիղնախի սիրո քաղաք:

Ուսանողներից ոմանք առաջին անգամ էին Վրաստանում․ նրանք վստահեցրին՝ մեծ սիրով ու հետաքրքրությամբ անցկացրին իրենց հանգիստը՝ ձեռք բերելով նոր գիտելիքներ։

Այսպիսով, ծանոթանալով վրացական պատմության նշանակալի դրվագներին, աբովյանականներն ունեցան ակտիվ հանգիստ և անմոռանալի հիշողություններ։

Ուսանողական խորհրդի նախագահ Պարույր Գալստյանը aspu.am-ի հետ զրույցում շնորհակալություն հայտնեց բուհի ղեկավարությանը, որ մշտապես աջակցում է կառույցի նախաձեռնություններին։

Նա վստահեցրեց՝ «Լավագույն ուսանող» մրցույթը կլինի շարունակական․այն խթանում է ուսանողների բարձր առաջադիմությանը, հասարակական և գիտական ակտիվ աշխատանքներում ներգրավվածությանը։