ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

«Ամառային դպրոց 2017» միջազգային ծրագրի շրջանակներում ապագա մանկավարժները Լիտվայում էին, ուր անցկացրած 10 օրերի ընթացքում հնարավորություն ունեցան երկրի կրթական համակարգին ու մշակույթին ծանոթանալը համատեղել լավ ժամանցի հետ:

Լիտվայի կրթական գիտությունների համալսարանի դասախոսները ծրագրի մասնակիցներին ծանոթացրին մերձբալթյան գողտրիկ երկրի պատմությանը, մշակույթին ու լեզվին. առաջին օրից ծրագիրը հագեցած էր քաղաքային զբոսանքներով,  տեսարժան վայրեր այցերով:

Համալսարանի մասին դասախոսություն, այց Վիլնյուսի Հին, ինչպես նաև Կերնավե քաղաքներ և Լիտվայի 13-֊րդ դարի մայրաքաղաք՝ Տրակայ, որի ամրոց-թանգարանում հայ ուսանողները ծանոթացան երկրի պատմության տարբեր փուլերին վերաբերող իրերի, գեղանկարների ու ձեռագրերի: Ծրագրի մասնակիցների հաջորդ կանգառը Լիտվայի Կաունաս քաղաքն էր, որը հայ ուսանողներին տպավորեց իր բազմաթիվ գրախանութներով, սրճարաններով ու լիտվական կոլորիտով:

«Աններելի կլիներ չայցելել նաև Վիլնյուսի նկարիչների թաղամաս` Ուժուպիս, որը քաղաքի այլ թաղամասերից տարբերվում էր յուրօրինակ մթնոլորտով, սթրիթ-արտի յուրատեսակ դրսևորմամբ, փակ ու բաց ցուցասրահների առատությամբ»,-aspu.am-ի հետ զրույցում նշեց ՀՊՄՀ-ի ուսանողուհի Աստղիկ Կիրակոսյանն ու անմոռանալի հուշերի կողքին հավելեց նաև Վիլնյուսի պետական համալսարանից և երկրի միակ հայկական Սուրբ Վարդան եկեղեցում ստացած տպավորությունները:

10-օրյա միջազգային ծրագրի ընթացքում այցեր եղան նաև թանգարաններ, հինավուրց շինություններ ու տաճարներ, ամրոցներ, որտեղ ամեն անկյունում գերիշխում էր միջնադարյան մշակութային շունչը:  

«Ամառային դպրոց 2017» միջազգային ծրագրի մասին խոսելիս Մանկավարժականի ոսւանողները հավելեցին, որ իրականացավ ծրագրի կարևորագույն նպատակներից մեկը`  տարբեր երկրներից եկած ուսանողների միջև ընկերական և միջմշակութային կապեր հաստատելը. «Ծրագրին մասնակցելը ունեցավ ևս մեկ էական և կարևոր նշանակություն. ծանոթանալով  բազմաթիվ ազգերին ու նրանց մշակույթին` մենք ևս մեկ անգամ վերագնահատեցինք մերը` հայկականը»,-հավելեցին ուսանողները: