ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

ՀՊՄՀ Գեղարվեստական կրթություն ֆակուլտետի երաժշտության մանկավարժության ամբիոնի դասախոս Արուսյակ Կոստանյանը մասնակցել է գիտական, ուսումնամեթոդական ստեղծագործական, մանկավարժական նախագծեր՝ «Երաժշտական կրթություն-XXI» II միջազգային մրցույթին։

Արուսյակ Կոստանյանի՝ «Հայ կոմպոզիտորների երգերի դաշնամուրային փոխադրումներ՝ մեթոդական ցուցումներ» խորագրով աշխատությունը, հեղինակավոր ժյուրիի կողմից, «Գործիքավորում, տրանսկրիպցիա և փոխադրում» անվանակարգում արժանացել է առաջին կարգի մրցանակի։

Մրցույթին մասնակցել է կրթական տարբեր հաստատություների շուրջ 54 մասնագետ, որոնք ներկայացրել են գիտական, ուսումնամեթոդական և երաժշտա-ստեղծագործական աշխատանքներ, այդ թվում՝ նախագծեր՝ ավանդական և ժամանակակից, մուլտիմեդիոն տեխնոլոգիաներ ներառող։

Ներկայացվել են «Երաժշտություն», «Համաշխարհային գեղարվեստական մշակույթ» «Երաժշտության տեսություն», «Երաժշտության պատմություն», «Երաժշտական ինֆորմատիկա», «Երաժշտական մանկավարժություն», «Սոլֆեջիո», «Գործիքային ներկայացում», «Երգչախմբային երգեցողություն», «Վոկալ», «Ժողովրդական արվեստ», երաժշտական կրթության և դաստիարակության հետ կապված այլ թեմաներ։

aspu.am-ի հետ զրույցում Արուսյակ Կոստանյանն ընդգծեց՝ հաղթանակը միայն իրենը չէ. «Հայ կոմպոզիտորների երգերի դաշնամուրային փոխադրումներ՝ մեթոդական ցուցումներ» աշխատության ստեղծմանը, որը ներառում է հայ կոմպոզիտորների և երգահանների ճանաչված, առավել սիրելի երգերի դաշնամուրային փոխադրումները և ներկայացված են որպես մանրանվագներ, իրենց խորհուրդներով և ուղղորդումներով օգնել են գործընկերները:

ՀՊՄՀ դասախոսը մրցույթը կարևորեց նաև Սանկտ Պետերբուրգի Գերցենի անվան պետական մանկավարժական համալսարանի հետ համագործակցության շրջանակներում փոխադարձ համերգների և դասախոսությունների անցկացման առումով։