ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Կամավորական պրակտիկա Հանքավանի «Հասմիկ» ճամբարում
18.07.2017
Կամավորական պրակտիկա Հանքավանի «Հասմիկ» ճամբարում

Մանկավարժական համալսարանի տարբեր կուրսերի ուսանողներն այս ամիսներին կամավորական պրակտիկա են անցում հանրապետության տարբեր ճամբարներում:

Հանքավանի «Հասմիկ» ճամբարն այս տարի ընդունել է առայժմ 9 ուսանողի, ովքեր 20-օրյա պրակտիկայից հետո աշխատանքի լավ գնահատականի և արդյունավետ համագործակցության դեպքում կարող են աշխատանքի անցնել ճամբարում:

«Հասմիկ» մանկական ճամբարի տնօրեն Ժորա Մուրադյանը բարձր է գնահատում Մանկավարժականի ուսանողների աշխատանքը՝ վստահեցնելով, որ այն երկուստեք արդյունավետ է և կարևոր:

«Յուրաքանչյուր մանկավարժի համար առաջին աստիճանը ճամբարում աշխատանքն է. երեխաների հետ անցկացրած առօրյան հնարավորություն է տալիս դրսևորել մանկավարժական կարողություններն ու հմտությունները»,-նշեց ճամբարի երկարամյա տնօրենն ու հավելեց, որ միշտ պատրաստ են կիսվել հմուտ ջոկատավարների փորձով և ուսանողներից էլ ակնկալել մանկավարժական նոր մոտեցումներ:

Փոխտնօրեն Մուրադ Մուրադյանի խոսքով՝ Մանկավարժական համալսարանի ուսանողներն առանձնանում են մասնագիտական պատրաստվածությամբ. որպես ապագա մանկավարժներ կիրառում բուհում ստացած տեսական գիտելիքներն ու հմտությունները:

«Ճամբարը երկար տարիներ Մանկավարժական համալսարանից ունեցել է պրակտիկանտներ և մշտապես բարձր գնահատել նրանց աշխատանքը, որ առանձնանում է միայն մանկավարժներին հատուկ կարողություններով, նոր ձեռնարկներ կազմակերպելու ձգտումով»,-նշեց փոխտնօրենն ու նկատեց՝ աշխատանքի ընթացքում ձգտում են պահպանել լավագույն ավանդույթներն ու դրանք համադրել նոր մեթոդների հետ:

Նրա խոսքով՝ տեղեկատվական տեխնոլոգիաների դարաշրջանում ճամբարը առօրյան այլ կերպ անցկացնելու միջոց ու հնարավորություն է, ուր գերիշխում են մանկական խաղերն ու լավագույն ժամանցը՝ առավոտյան վերկացից մինչ տոնական քայլերթ ու մրցույթների կազմակերպում:

Թերեզա Հովհաննիսյանը ՀՄՊՀ-ի Բանասիրական ֆակուլտետի ուսնաղուհի է, ճամբար է եկել այն վստահությամբ, որ ձեռք բերած գիտելիքները կօգնեն առավել հեշտ հարմարվել դպրոցում աշխատանքին. «Օրվա տարբեր ժամերին տարիքային տարբեր խմբերի երեխաներին տեսնում ենք տարբեր իրավիճակներում ու փորձում կողմնորոշվել՝ ինչ մեթոդով աշխատել: Սա լավ հնարավորություն է նաև տեղում նորը բացահայտելու և յուրացնելու համար»:

Նրա համակուրսեցի Սեդա Բաղդասարյանն էլ հավելում է, որ ճամբարի տնօրինությունը սիրով է ընդունում երեխաների հետ աշխատելու, նոր միջոցառումներ կազմակերպելու իրենց նախաձեռնությունները, ինչը թույլ է տալիս մասնագիտական ոլորտում լինել ավելի ազատ:

Ապագա հատուկ մանկավարժ Սոֆյա Աբրահամյանը չնայած 1-ին կուրսի ուսանող է, բայց վստահ է՝ սահմանափակ կարողություններով երեխաների հետ լավ աշխատելու համար նախ պետք է բացահայտի առանց այդ խնդիրների երեխաների հետ աշխատանքի դժվարություններն ու մեթոդները: Պրակտիկայի ավարտին դեռ 10 օր կա, բայց հաստատակամ է՝ աշխատանքը ճամբարում շարունակելու ցանկությունը մեծ է:

aspu.am-ի հետ զրույցում պրակտիկանտները նշեցին, որ համալսարանում ստացած տեսական գիտելիքները բավարար են մանկավարժական մեթոդները գործնականում կիրառելու համար: