ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

ԿԳՄՍ նախարարն այցելել էր Հենակետային վարժարան
05.10.2021
ԿԳՄՍ նախարարն այցելել էր Հենակետային վարժարան

Ուսուցչի օրվա առթիվ Մանկավարժական համալսարանի հենակետային վարժարան (ավագ դպրոց) էր այցելել ՀՀ կրթության, գիտության, մշակույթի և սպորտի նախարար Վահրամ Դումանյանը, նախարարի տեղակալ Ժաննա Անդրեասյանը, «Կրթական ծրագրերի կենտրոն» /ԾԻԳ/ տնօրենի պաշտոնակատար Գրիշա Հովհաննիսյանը:

ՀՀ ԿԳՄՍ նախարարը շրջայց կատարեց ժամանակակից բոլոր պահանջներին համապատասխանող հիմնանորոգված դպրոցում, այցելեց կահավորված դասասենյակներ, արհեստանոց, հանդիսությունների դահլիճ, քիմիայի, կենսաբանության, աշխարհագրության և ֆիզիկայի լաբորատոր սենյակներ, իր գոհունակությունը հայտնեց արդյունքի վերաբերյալ:

Նախարարը հույս հայտնեց, որ Մանկավարժական համալսարանի ռեկտորի ժամանավոր պաշտոնակատար Աշոտ Խոեցյանի ղեկավարությամբ ավարտին կհասցվի նաև դպրոցի մարզադահլիճի վերանորոգման աշխատանքները:

ՀՊՄՀ հենակետային վարժարանի (ավագ դպրոց) մասնաշենքը հիմնանորոգվել է ՀՀ ԿԳՄՍ- «Կրթական ծրագրերի կենտրոն» ԾԻԳ ՊՀ «Աջակցություն միջնակարգ դպրոցի երրորդ աստիճանի զարգացմանը» ենթաբաղադրիչի աշխատանքների շրջանակներում, իսկ ՀՊՄՀ-ի ջանքերով տեղադրվել է նաև արևային ջեռուցման համակարգ:

Դպրոցում շրջայցին և կրթօջախի նոր պայմաններին ծանոթանալուն հաջորդեց Վահրամ Դումանյանի հանդիպումը ուսուցչական կազմի հետ: Նախարարը շնորհավորեց մասնագիտական տոնի առթիվ՝ վստահեցնելով, որ հասարակության մեջ այսօր առավել քան երբևէ արժևորվում է ուսուցչի դերը, կատարած աշխատանքի կարևորությունը. «Մեր երկրի ամենամեծ անվտանգությունը ճիշտ կրթությունն է. սիրելի ուսուցիչներ, դուք եք մեր հրամանատարները, ձեզնով է ամուր պետության հիմքը, վաղվա որոշիչ օրը: Ցավոք, մեր պետությունն այսօր չունի բավականաչափ ռեսուրս, որ, ըստ արժանվույն, վարձատրի ուսուցչին, սակայն վստահեցնում եմ՝ մենք աշխատում ենք այդ ուղղությամբ և փորձում ստեղծել բոլոր հնարավոր պայմանները»:

ԿԳՄՍ նախարար Վահրամ Դումանյանը վստահեցրեց՝ հանրակրթությունը ՀՀ կառավարության ուշադրության առանցքում է, նախարարությունն էլ մշակում է այնպիսի համակարգ, որը հնարավորություն կտա համատարած՝ ընդհանուր մոտեցումից անցում կատարել անհատականացված մոտեցման. կամավոր ատեստավորումն այդ ուղղությամբ առաջին քայլն է. «Վստահ եղեք` ամեն օր, ամեն ժամ ձեզ հետ ենք, ձեր հոգսերով, որը նաև բոլորինս է»:

Նախարարի տեղակալ Ժաննա Անդրեասյանը նույնպես շնորհավորեց «Ուսուցչի օր»-ը և այդ շրջանակում դպրոց այցելությունը համարեց խորհրդանշական.տարիներ շարունակ այստեղ մանկավարժներ են կրթվել.«Մեծ պատիվ է այս շենքում դասավանդելը.վստահ եմ՝ մեծ պատասխանատվությամբ և նվիրվածությամբ եք կատարում ձեր աշխատանքը, իսկ նոր պայմաններն ավելի հետաքրքիր, դյուրին և հաճելի կդարձնի այն: Միջավայրը, աշխատանքային պայմաններն ու գործիքները էականորեն ազդում են աշխատանքի արդյունավետության վրա»:

Նախարարի տեղակալն անդրադարձավ առարկայական չափորոշիչների փոփոխության վերաբերյալ հարցին, և նշեց, որ որոշ առարկաների դեպքում դրանք լրամշակվել են, սակայն վերջնական փուլում չեն. ուսումնական տարվա ավարտին փորձարկված տարբերակները դարձյալ կլրամշակվեն:

Ժաննա Անդրեասյանը հույս հայտնեց, որ մոտ ապագայում կլուծվի նաև ծրագրերը բեռնաթափելու, առարկաները վերանայելու խնդիրը:

Հենակետային վարժարանի (ավագ դպրոց) տնօրեն Նաիրա Սաֆարյանը վստահեցրեց՝ ժամանակակից գույքով կահավորված դպրոցում առավել ոգևորված և նոր ուժերով և եռանդով են աշխատում. «Ամեն օր իմ աշակերտներին և գործընկերներին ասում եմ՝ պետք է մնանք մեր տեղում և լավ կատարենք այն գործը, որին կոչված ենք. միայն դրանով կարող ենք ուժեղանալ և պայքարել: Վարժարանն ուսուցչական լավ ներուժ ունի. գիտությունների 8 թեկնածու, 2 դոկտոր, պրոֆեսոր, իսկ ուսուցիչներից 10-ն արդենիսկ մասնակցել է կամավոր ատեստավորմանը»:

Նաիրա Սաֆարյանը նշեց՝ ի հեճուկս ամենատարբեր քննարկումների, հավելավճար ստանում են նաև ուսուցիչները. Մանկավարժական համալսարանի ռեկտորի պաշտոնակատար, պրոֆեսոր Աշոտ Խոեցյանի հրամանով՝ մասնագիտական տոնի նախօրեին մեկ ամսվա աշխատավարձի չափով պարգևատրվել են նաև ՀՊՄՀ հենակետային վարժարանի ուսուցիչները: