Այսօր Մանկավարժական համալսարանում հյուրընկալվել էր ՌԴ-ի տարբեր բուհերի, այդ թվում Մոսկվայի քաղաքային մանկավարժական համալսարանի, և ինստիտուտների ներկայացուցիչների պատվիրակությունը՝ Երևանի քաղաքապետարանի Հանրակրթության վարչության պետ Աննա Ստեփանյանի ղեկավարությամբ:
Հյուրերը եղան բուհի թանգարանում, ծանոթացան համալսարանի հիմնադրման պատմությանը, ժամանակագրությանը, ապա այցելեցին ՀՊՄՀ-ի «Շախմատ» գիտահետազոտական ինստիտուտ:
Ինստիտուտի գիտական ծրագրի ղեկավար Վահան Սարգսյանը հյուրերին ներկայացարեց կառույցի գործունեությունը, ձեռբերումներն ու հաջողությունները՝ խոսելով նաև «Շախմատի»՝ որպես դպրոցում պարտադիր առարկայի դասավանդման փորձի ու արդյունքների մասին: Վահան Սարգսյանն ընդգծեց նաև, որ ինստիտուտը միջազգային գիտաժողովների և այլ ձեռնարկների շրջանականերում իր հաջողված փորձը կիսում է դրանով հետաքրքրված երկրների հետ:
Ռուս գործընկերներն ուղղեցին Ինստիտուտի գործունեությանը վերաբերող մի շարք հարցեր, հատկապես «Շախմատ» առարկայի դասավանդման առանձնահատկությունների, դրա արդյունավետության վերաբերյալ:
Պատվիրակությանն հյուրընկալեց նաև Մանկավարժական համալսարանի ռեկտոր Ռուբեն Միրզախանյանը և ներկայացնելով ռուսական մի շարք բուհերի հետ արդյունավետ համագործակցությունը՝ վստահեցրեց, որ պատրաստ են ընլայնել համագործակցության շրջանակները: Գործընկեր բուհերի ուսանողների և դասախոսների փոխանակումից, փոխայցերից բացի, ռեկտորը կարևորեց հատկապես «Ամառային դպրոց» միջազգային ծրագրի համատեղ իրականացումը:
«Երբ օտար լեզուն դասավանդում է նույն լեզվի կրողը, արդյունքը լինում է ավելի լավը: Համագործակցությունը պետք է ընդլայնենք առաջին հերթին այս տեսանկյունից, քանի որ տարեցտարի կորցնում ենք ռուսերենը»,-նշեց Ռուբեն Միրզախանյանն ու հավելեց, որ Մանկավարժական համալսարանը ձգոտւմ է ՌԴ-ի տարբեր բուհերի հետ հաստատել ամուր և շարունակական գործընկերություն:
Պատվիրակները շնորհակալություն հայտնեցին հյուրընկալության համար և հույս հայտնեցին, որ կկարողանան համագործակցել ինչպես գիտական համատեղ հետազոտությունների, այնպես էլ շախմատի դասավանդման և այլ ուղղություններով:
Նշենք, որ ռուս պատվիրակներն այցի շրջանակներում եղել են հանրապետության տարբեր բուհերում և դպրոցներում, նախանշել կրթական ոլորտում հայ-ռուսական համագործակցության նոր հնարավորություններ և ուղիներ: