Մանկավարժական համալսարանի պրոֆեսորադասախոսական կազմը, ասպիրանտներն ու մագիստրոսները ՀՀ կառավարության «Զինծառայողի կրթական կարիքների գնահատման
հետազոտություն եւ կրթական ծրագրերի իրականացում ՀՀ ԶՈՒ զորամասերում» ծրագրի շրջանակում այս անգամ այցելել էին Արարատի զորամասերից մեկը:
Արարատի զորամասի 400 զինծառայողներից ծրագրին ցանկացել են մասնակցել մոտ 200-ը:
Այցելության առաջին օրը մասնագետներն ուսումնասիրեցին յուրաքանչյուր առարկայի ուղղությամբ զինծառայողների պատրաստվածության մակարդակը, որի համաձայն էլ կատարվեց ենթախմբերի բաժանումը:
Ժամկետային զինծառայող Ավետիս Վարոսյանը ընտրել է մաթեմատիկայի, անգլերենի և ինֆորմատիկայի դասընթացները: Ծրագրի մասին լսելով`անակնկալի է եկել. «Չէի սպասում, որ կկազմակերպվեն այնպիսի դասընթացներ, որոնք կբավարարեն զինծառայողների կրթական կարիքները: Կարծում եմ` վաղաժամ է խոսել արդյունքների մասին. ծրագիրը սկզբնական փուլում է, բայց վստահ եմ`այն կծառայի իր նպատակին, և զինծառայողները զորացրվելուց հետո կկարողանան սովորել իրենց նախընտրած ուսումնական հաստատատություններում,-ասում է Ավետիս Վարոսյանը:
Համալսարանի Ռազմավարական կառավարման վարչության պետ Ռիտա Գևորգյանն էլ մեզ հետ զրույցում տեղեկացրեց, որ ակտիվ աշխատանքներ կտարվեն այն խմբերի հետ, որոնք ունեն ավելի թույլ պատրաստվածության մակարդակ.«Վստահ եմ` նրանք կտիրապետեն գիտելքիների այն պաշարին, որը նախատեսված է ուսումնական պլանով»:
Շարքային Արամայիս Հակոբյանը ծրագրի մասին իմացել է երկու շաբաթ առաջ: Այսօր առաջին անգամ մասնակցել է պատմության դասընթացին: Որպես ապագա պատմաբան` ցանկանում է վերհիշել պատմության մասին ունեցած իր գիտելիքները: Ասում է, որ սա հաճելի փոփոխություն է զինվորների առօրյայում. «Կարծում եմ, որ սա հիանալի հնարավորություն է հատկապես այն զինծառայողների համար, որոնք նոր են պատրաստվում ընդունվել որևէ ուսումնական հաստատատություն: Մի քանի ժամյա պարապմունքներով դժվար է ընդունվել բուհ. սա ոչ այնքան պատրաստական որքան նախապատրաստական փուլ է նրանց համար»,-ասում է Արամայիսը:
Սկզբնական կրթության ֆակուլտետի Մաթեմատիկայի և տարրական ուսուցման մեթոդիկայի ամբիոնի վարիչ Հայկունի Հարությունյանը զինծառայողների պատրաստվածության մակարդակը այնքան էլ բարձր չի գնահատում, սակայն կարևորում է նրանց սովորելու ցանկությունը. «Մենք երկու ամսում հրաշքներ չենք գործելու. կազմվել է իրատեսական ծրագիր, որը սերտելու դեպքում նվազագույն միավորի շեմը նրանք կհաղթահարեն»:
Տաթևիկ Հարությունյանը Պատմության և իրավագիտության ֆակուլտետի մագիստրոս է. մեծ ոգևորությամբ մասնակցում է ծրագրին. «Առաջին դասի շրջանակում ծանոթացանք զինվորների մասնագիտական նախասիրություններին, նրանց ներկայացրեցինք իրենց ընտրած առարկայի ներածական մասը: Զինծառայողները ոգևորված են. ասում են` չնայած ժամանակի սղությանը հավանաբար կհասցնենք պատրաստվել բուհի ընդունելությանը»:
Հիշեցնենք, որ ՀՀ կառավարության ծրագրի նպատակն է ծառայության վերջին ամիսների ընթացքում ուսումնասիրել զինծառայողի կրթության նկատմամբ հակումներն ու նախասիրությունները, ունակություններն ու կարողությունները, կրթությունը շարունակելու նպատակամղվածությունը, նախանշել յուրաքանչյուր զինծառայողի համար կրթական կարիքների կազմը և նախատրաստել նրանց` ՀՀ բուհերում, նախնական եւ միջին մասնագիտական ուսումնական հաստատություններում ուսումը շարունակելուն:
