Հատուկ կրթության ֆակուլտետի հրավերով այսօր համալսարանում հյուրընկալել էին բուհի նախկին դասախոսներ Նարինե Լութոնյանն ու Հովհաննես Աղավելյանը:
Նարինե Լութոնյանը 1983-1994 թվականներին դասավանդել է Մանկավարժական համալսարանի Դեֆեկտոլոգիայի բաժնում, իսկ 1997 թվականից մինչ օրս իր գործունեությունն է ծավալում Իսպանիայում` ղեկավարելով «Փախստականների պետական կոմիտեի հոգեբանական ծառայություն»-ը և «Միայնակ մայրերի համաեվրոպական հիմնադրամ» նախագիծը:
Դեֆեկտոլոգիայի ամբիոնի նախկին ղեկավար Հովհաննես Աղավելյանը ներկայումս Նովոսիբիրսկի պետական մանկավարժական համալսարանի շտկողական մանկավարժության և հոգեբանության ամբիոնի պրոֆեսոր է:
Դասախոսությանը ներկա էին ոլորտի տարբեր սերունդների մասնագետներ, որոնցից մի քանիսը բանախոսների ուսանողներն են եղել, իսկ մյուսները` պարզապես նախկին գործընկերներ:
Հատուկ կրթության ֆակուլտետի դեկան, մանկավարժական գիտությունների թեկնածու, դոցենտ Արմինե Ավագյանը, ողջունելով ներկաներին, ասաց. «Այսօր յուրահատուկ տոն է մեզ համար, քանի որ ուսումնական տարվա վերջին օրն ամփոփում ենք գիտելիքով: Մեր հյուրերն իրենց ուրույն հետքն են թողել հայրենական և համաշխարհային հատուկ կրթության ոլորտում:
Նրանք իրենց մեծ ավանդն են ունեցել ուսանողների մասնագիտական հաջողություններում: Ես հպարտ եմ նրանց ուսանողը լինելու համար, և ուրախ, որ իմ ուսանողները վերջիններիս դասախոսությունը լսելու հնարավորություն ունեն»:
Նարինե Լութոնյանը շնորհակալություն հայտնեց հրավերի, 20 տարի անց Մանկավարժականում կրկին դասախոսելու և ջերմ ընդունելության համար:
Խոսելով երեխաների հոգեվիճակի վրա սոցիալական հիմնախնդիրների անդրադարձի մասին` Նարինե Լութոնյանը ներկայացրեց իր ղեկավարած կենտրոնների գործառույթները, ինչպես նաև` հոգեբանության ոլորտում տարիների ընթացքում ձեռք բերած շոշափելի արդյունքները:
«Սկզբանական շրջանում աշխատել եմ Իսպանական թագավորությունում «Փախստականների, ապաստան փնտրողների կոմիտե»-ում, ապա, հասկանալով, որ ամբողջ աշխարհում մասսայական բնույթ են կրում տնտեսական և սոցիալական փոփոխությունների հետևանքով առաջացած հոգեբանական խնդիրները, սկսեցի ղեկավարել նաև այլ ծրագրեր»,-ասաց Նարինե Լութոնյանը, ում առաջարկով էլ Իսպանիայում հիմնվել են վերոնշյալ ծառայությունն ու նախագիծը:
Խոսելով «Միայնակ մայրերի համաեվրոպական հիմնադրամ» նախագծի մասին` Լութոնյանը նկատեց, որ սոցիալական ծրագրի միջոցով փորձ է արվում ֆինանսապես և հոգեպես օգնություն ցուցաբերել միայնակ մայրերին:
Վերջինիս դասախոսությանը հաջորդեց Նովոսիբիրսկի պետական մանկավարժական համալսարանի շտկողական մանկավարժության և հոգեբանության ամբիոնի պրոֆեսոր, Դեֆեկտոլոգիայի ամբիոնի նախկին վարիչ Հովհաննես Աղավելյանի` «Հատուկ կրթության համակարգը Ռուսաստանում» թեմայով դասախոսությունը:
Դասախոսությունների ավարտին ներկաները հյուրերին ուղղեցին մասնագիտական հարցեր, որոնց շուրջ ծավալվեց բուռն և հետաքրքիր քննարկում: