ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Պատանի պատմագետները՝ Հայաստանի մայրաքաղաքների մասին
18.10.2017
Պատանի պատմագետները՝ Հայաստանի մայրաքաղաքների մասին

Մանկավարժական համալսարանում կայացավ բուհի Հենակետային վարժարանի (ավագ դպրոց) պատմագետների ակումբի առաջին գիտաժողովը՝ «Հայաստանի մայրաքաղաքները» խորագրով:

Նորաստեղծ ակումբում ընդգրված է վարժարանի 10-12-րդ դասարանների շուրջ 55 աշակերտ.նրանցից այսօր զեկույցներով հանդես եկավ 15-ը՝ ներկայացնելով Հայաստանի 12 մայրաքաղաքների մասին պատմություններ և ուշագրավ փաստեր:

Բուհ-դպրոց համագործակցության շրջանակներում ստեղծված ակումբի հիմնադրումը պատահական չէ.նախաձեռնողները Մանկավարժականի Հայոց պատմության ամբիոնի դոցենտներ, պատմական գիտությունների թեկնածու, պատմական գիտությունների դոկտոր Արմինե Եփրիկյանն ու Սամվել Պողոսյանն են:

Վերջիններս պատմության դասեր են տալիս նաև ՀՊՄՀ-ի Հենակետային վարժարանում՝ կրտսեր սերնդին ծանոթացնելով հայոց պատմությանն ու Հայաստանի պատմամշակութային օջախներին:

«Շատերիդ կյանքում սա առաջին գիտաժողովն է, որի միջոցով փորձելու եք գիտական թեմայի շրջանակում ներկայացնել որևէ հետաքրքիր բան: Գիտական մեծ նորույթներ դժվար թե լինեն, սակայն սերն առ գիտություն սկսվում է այստեղից, ինչը գուցե շատերին ուղղորդի դեպի գիտության աշխարհ»,- ողջույնի իր խոսքում նշեց Սամվել Պողոսյանը:

Արմինե Եփրիկյանն էլ վստահեցրեց՝ առաջիկայում անելիքները շատ են. արդեն իսկ կազմակերպված արշավներին, գիտաժողովին կհաջորդեն նոր ու առավել հետաքրքիր ծրագրեր:

Լրագրության հոսքի 11-րդ դասարանի աշակերտուհի Միլենա Բարսեղյանը դպրոցում փակցված հայտարարությունը տեսնելով շտապել է գրանցվել սեփական պատմության մասին ամեն ինչ իմանալ ցանկացողների ակումբում:

Գիտաժողովին ներկայացնելու է Շիրակավան մայրաքաղաքի պատմությունն ու դրա հետ կապված իրադարձություները: Վստահ է՝ Բագրատունիների թագավորության կենտրոնի մասին տարբեր աղբյուներից հավածաք փաստերը կհետաքրքրեն ընկերներին՝ նրանց համար դառնալով նոր բացահայտումների աղբյուր:

Հայաստանի Հանրապետության ներկայիս մայրաքաղաքի՝ Երևանի 2799-ամյակին նվիրված գիտաժողովը շարունակվեց մեր երկրի վարչաքաղաքական, տնտեսական, կրոնական-մշակութային կենտրոնների մասին պատմող զեկույցներով, որոնք ուղեկցվեցին պաստառներով և տեսասահիկներով: