ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

«Շուշիի ազատագրումն իր նշանակությամբ համարժեք էր մի ողջ պետության ստեղծման». Տիգրան Պետրոսյանց
09.05.2018
«Շուշիի ազատագրումն իր նշանակությամբ համարժեք էր մի ողջ պետության ստեղծման». Տիգրան Պետրոսյանց

Մայիսի 9-ին նշվում է Հայրենական մեծ պատերազմում ֆաշիզմի դեմ տարած հաղթանակի, Շուշիի ազատագրման տարեդարձերի, ինչպես նաև Արցախի պաշտպանության բանակի հիմնադրման օրը:

Փառավոր հաղթանակների և պատմական մեծ նշանակություն ունեցող տոների առթիվ Մանկավարժական համալսարանի պրոֆեսորադասախոսական կազմը, ուսանողները` ռեկտոր Ռուբեն Միրզախանյանի գլխավորությամբ այս տարի ևս նախ ծաղկեպսակ դրեցին համալսարանի տարածքում գտնվող Արցախյան հերոսների հիշատակը հավերժացնող հուշարձանի մոտ, ապա շարժվեցին «Հաղթանակի» զբոսայգի:

Ծաղկեպսակ դնելով անմար կրակի մոտ` աբովյանականները գլուխ խոնարհեցին և մեկ րոպե լռությամբ հարգեցին զոհվածների հիշատակը։

Մանկավարժական համալսարանի Գրադարանի տնօրեն, Արցախյան պատերազմի մասնակից, պատմաբան Տիգրան Պետրոսյանցի կարծիքով՝ եռատոնը մեծ նշանակություն ունի ինչպես հայ ազգի, այնպես էլ ողջ մարդկության համար:

«Ամեն պատերազմ ունի իր կարևորագույն քայլը. Հայրենական մեծ պատերազմում մեր հայրերի տարած հաղթանակը ոգեշնչեց արցախյան հերոսներին, իսկ Շուշիի ազատագրումն իր նշանակությամբ համարժեք էր մի ողջ պետության ստեղծման: Հաղթանակների տանող քայլերը խթան հանդիսացան, որ պատերազմի մասնակիցների սերունդներն ու շառավիղները տարբեր տարիներին թույլ չտան թշնամուն իրականացնելու սեփական երազանքները»,-նշեց Տիգրան Պետրոսյանցն ու վստահեցրեց, որ հայազգի յուրաքանչյուր զինվոր իր մեջ կրում է նախնիների քաջությունն ու վճռականությունը՝ պատմության մեջ մշտապես պետք է լինի Հայաստանի Հանրապետությունը:

Տիգրան Պետրոսյանցը կարևորեց նաև Մանկավարժական համալսարանի` եռատոնի առթիվ ամեն տարի կազմակերպվող երթը` վստահեցնելով, որ ապագա մանկավարժը նախ իր մտածողության մեջ պետք է հայրենասիրություն ունենա, որ կարողանա այն փոխանցել եկող սերունդներին: