ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Այսօր Մանկավարժական համալսարանի ռեկտոր Ռուբեն Միրզախանյանն ու պրոռեկտորները տարեվերջյան հանդիպում ունեցան բուհի Ուսանողական խորհրդի անդամների հետ, որի նպատակն էր ուսանողների հետ քննարկել  տարվա ձեռքբերումները, խնդիրներն ու նրանց հուզող այլ հարցեր:

Հանդիպման ընթացքում ուսանողներն անդրադարձան բուհում վերջերս ներդրված էլեկտրոնային կրթական նոր հարթակին՝ Google Classroom-ին, խոսեցին համակարգի առավելությունների և դժվարությունների մասին:

Ռուբեն Միրզախանյանը նկատեց, որ եվրոպական և ամերիկյան համալսարանում առցանց ուսուցման համակարգը ներդրվել է շուրջ 15 տարի առաջ և  սկզբնական շրջանում ևս ունեցել որոշ խնդիրներ.«Յուրաքանչյուր նոր կրթական համակարգ պետք է հարմարեցվի ազգային, տեղական կրթական համակարգին և նրա առանձնահատկություններին, որից հետո միայն այն կունենա դրական արդյունք»,-ընդգծեց ռեկտորը:

Հանդիպման ընթացքում ուսանողներն անդրադարձան նաև «Ամառային դպրոց» ծրագրին: Ռուբեն Միրզախանյանը խոսելով միջազգային համագործակցության, «Ամառային դպրոց»-ի, ուսանողների փոխանակային ծրագրերի մասին՝  ընդգծեց, որ  հիմնական խնդիրը շարունակում է մնալ օտար լեզուների իմացությունը. «Ոչինչ այնպես չի ստիպի մարդուն սովորել օտար լեզու, որքան անհրաժեշտությունը: Մայրենի լեզուն պետք է իմանալ գերազանց, սակայն այս դարաշրջանում առանց օտար լեզվի իմացության ևս դժվար է: Անկախ մասնագիտությունից՝ օտար լեզվի իմացությունն անհրաժեշտ է.  այն պետք է նաև լավ մասնագետ դառնալու համար»,- ասաց Ռուբեն Միրզախանյանը:

Խոսելով համալսարան-գործատու համագործակցության մասին՝ ռեկտորը նկատեց, որ այսօր մի կողմից գործազրկություն է, սակայն մյուս կողմից էլ աշխատաշուկան լավ մասնագետների պահանջարկ ունի: Բուհի վարկանիշի բարձրացման մասին խոսելիս էլ Ռուբեն Միրզախանյանն  ուսանողներին հորդորեց ամեն ինչ անել բուհի վարկանիշը պահելու և այն բարձրացնելու գործում:

Ուսանողները շնորհակալություն հայտնեցին ռեկտորին ընդունելության և մտեմիկ զրույցի համար`  բարձր գնահատելով բուհի կողմից իրականացվող ուսանողակենտրոն քաղաքականությունը՝ ի դեմս ռեկտորի:

Հանդիպման ավարտին Կուլտուրայի ֆակուլտետի Հեռուստառեժիսուրա բաժնի ուսանողներ Արթուր Հովհաննիսյանին և Հրագ Քեշիշյանին հանձնվեց ՀՀ ՊՆ «Դրաստամատ Կանայան» մեդալ՝ առաջնագծում մասնագիտական գործունեություն ծավալելու համար:

Ռուբեն Սևակի անվան ամենամյա մրցանակն էլ այս տարի հանձնվեց Օտար լեզուների ֆակուլտետի Անգլերեն լեզու և գրականություն բաժնի ուսանողուհի Էլեն Ավետիսյանին և ՀՊՄՀ-ի հենակետային վարժարանի /ավագ դպրոց/ 12-րդ դասարանի աշակերտուհի Նանե Պետրոսյանցին:

Հանդիպման ավարտին Ռուբեն Միրզախանյանը  ներկաներին շնորհավորեց  գալիք Ամանորի և  Սուրբ Ծննդյան առթիվ: