Այսօր ուսումնական տարվա մեկնարկն ազդարարվեց նաև Մանկավարժական համալսարանի համար 57 հիմնական դպրոցում:
Նոր ուսումնական տարվա 1-ին օրը դպրոցն իր դռներն էր բացել 1-ին դասարանի 62 աշակերտների առջև: Համավարակով պայմանավորված` դպրոցի բակը նախկինի պես մարդաշատ չէր:
Դիմակի պարտադիր կրում, ջերմաչափում, ախտահանում և այլն. հենց մուտքի մոտ փոքրիկները տեղեկացան և կիրառեցին հակահամաճարակային կաննոները, որոնք պահպանելու են առաջիկա ամիսներին: Ուսումնական առաջին օրը դպրոցում շարունակվեց դասընկերների և դասվարի հետ ծանոթությամբ:
Դպրոցի տնօրեն Նաիրա Տողանյանը ուսումնական տարեսկզբի առթիվ շնորհավորեց աշակերտներին և նրանց ծնողներին՝ վստահեցնելով, որ փորձառու ուսուցիչներն ամեն ինչ անելու են աշակերտներին գիտելիքներով զինելու և նրանց դպրոցական առօրյան լավ կազմակերպելու համար:
Տնօրենը վստահեցրեց նաև, որ ամեն օր ախտահանվելու են դասարանները, պահպանվելու պարետատան ցուցումները:
Մանկավարժական համալսարանը շնորհավորում է բոլոր աշակերտներին, մանկավարժներին, կրթության գործի նվիրյալներին, մաղթում լուսավոր ճանապարհ, ձեռքբերումներով լի նոր ուսումնական տարի: