ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Մայիսի 15-19-ը ՀՊՄՀ Աշխատակազմի և միջազգային համագործակցության հարցերի գծով պրոռեկտոր Մարիաննա Հարությունյանը Իսպանիայի Սևիլիայի համալսարանում էր, որտեղ մասնակցեց «Միջազգային շաբաթ» խորագրով վերապատրաստմանը:

Մանկավարժականը Սևիլիայի համալսարանի հետ համագործակցում է 2019 թվականից՝ Էրազմուս+ կրեդիտային շարժունության ծրագրի շրջանակներում։

Վերապատրաստմանը մասնակցում էին Սևիլիայի գործընկեր համալսարանների ներկայացուցիչներ՝ ավելի քան 10 երկրից։

Մասնակիցները ծանոթացան Սևիլիայի համալսարանի պատմությանը, իրականացվող հետազոտական և կարողությունների զարգացման ծրագրերին, այցելեցին համալսարանական կամպուսները:

Այցի շրջանակներում ՀՊՄՀ պրոռեկտոր Մարիաննա Հարությունյանը, համագործացկության հետագա ընդլայնման և երկարաժամկետ ծրագրեր իրականացնելու նպատակով, հանդիպումներ ունեցավ Սևիլիայի համալսարանի աշխատակիցների հետ։

Սևիլիայի համալսարանը Իսպանիայի հնագույն համալսարաններից է․ հիմնադրվել է 1505 թվականին: Կրթական հաստատությունն իրականացնում է բազմաթիվ միջազգային և տեղական ծրագրեր, իսկ ստացվող ֆինանսական ներհոսքի առումով՝ իսպանական համալսարանների շարքում զբաղեցնում առաջին հորիզոնականը:

Համալսարանը նաև ակտիվ ներգրավված է ուսանողների շարժունության և փոխանակման ծրագրերում և, որպես ամենաշատ միջազգային ուսանողներ հյուրընկալող երկիր, հանդիսանում է առաջատարը Իսպանիայում։