ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Մանկավարժական համալսարանում Հոգաբարձուների խորհրդի նախագահ, ՀՀ ԿԳՄՍ փոխնախարար Ժաննա Անդրեասյանի նախագահությամբ կայացավ բուհի խորհրդի այս տարվա առաջին նիստը։ Նիստին ներկա էր Խորհրդի 17 անդամ:

Ռեկտորի պաշտոնակատար Սրբուհի Գևորգյանը խորհրդի անդամներին ներկայացրեց ՀՊՄՀ-ի 2021 թվականի ֆինանսական գործունեության վերաբերյալ հաշվետվությունը՝ տարվա դրամական մուտքերի և ելքերի դինամիկան, դրամական ելքերի բաշխվածությունը, 1-ին կուրսեցիների և ուսանողների ընդհանուր թիվն՝ ըստ տարիների:

Սրբուհի Գևորգյանը բուհի ֆինասական գործունեությունը տարեկան կտրվածքով համարեց դրական՝ նշելով, որ 2022 թվական համալսարանը մուտք է գործել տնտեսումով և չնայած ուսանողների թվի կրճատմանը՝ բուհը ֆինանսական կայուն վիճակում է, ունի վերջին երեք տարիների ամենաբարձր տնտեսումը:

Ռեկտորի պաշտոնակատարն ընդգծեց, որ բուհի ներկայիս ֆինանսական կայունությունը պայմանավորված է նաև տարիներ առաջ վարձավճարների բարձրացմամբ:

Բուհի գործունեության մյուս մանրամասներն ամփոփված էին Մանկավարժական համալսարանում 2021 թվականին տեղի ունեցած իրադարձությունների մասին պատմող Լրատվության և հանրության հետ կապերի վարչության պատրաստած տեսաֆիլմում:

Հոգաբարձուների խորհրդի նախագահ Ժաննա Անդրեասյանը մտահոգիչ համարեց վերջին տարիներին բուհի ուսանողների թվի նվազումը և կարևոր համարեց պարզաբանել՝ նվազումը համաչա՞փ է, թե՞ որոշ մասնագիտություններ այդ ցանկում գերակշռում են:

Խորհրդի նախագահը հորդորեց նաև առավել ակտիվ մասնակցել դրամաշնորհային ծրագրերին՝ խթանելով բուհի համապատասխան կարողություների, ռեսուրսների զարգացումը:

Նիստի ընթացքում Խորհրդի անդամները հաստատեցին 2022 թվականի բյուջեի նախահաշիվը, որոշ հաստիքների կրճատումների և փոփոխությունների վերաբերյալ փաստաթուղթը:

2022 թվականի ֆինանսական նախահաշվի մասին խոսելիս՝ Սրբուհի Գևորգյանը նկատեց, որ նախատեսվում է վերանորոգման աշխատանքներ իրականացնել Աղավնաձորի ուսումնական բազայում. նախահաշվում տեղ են գտել նաև բուհի 100-ամյակի միջոցառումներին ուղղված ծախսերը, աշխատողների առողջապահական ապահովագրությունը և այլն:

Հոգաբարձուների խորհրդի նիստում աշխատանքային բուռն քննարկում ծավալվեց բուհի՝ 2021-2025 թթ. Ռազմավարական ծրագրի շուրջ:
ՀՊՄՀ ռեկտորի պաշտոնակատարն ընդգծեց, որ բաց են ցանկացած առաջարկի և դիտարկման համար. չի թաքցնում՝ փաստաթուղթը լրացուցիչ վերլուծության է ենթարկվել, կան մի շարք բացթողումներ բուհի գործունեության վերաբերյալ:

Սրբուհի Գևորգյանը նկատում է՝ դրա համար հիմք են ծառայել նաև բարձրագույն կրթության ոլորտում, մասնավորապես, մանկավարժությունում տեղի ունեցող փոփոխությունները.«Համալսարանի կրթական ծրագիրը կախված է դպրոց-բուհ ծրագրերի, չափանիշների ունիֆիկացումից. մեր հիմնական «կլինիկան» դպրոցն է, և եթե համարժեք կրթական ծրագիր չունենանք, չպատրաստենք, չվերազինենք որակավորված մասնագետներ, չենք համապատասխանի ժամանակի մարտահրավերներին»:

Խորհրդի նախագահ Ժաննա Անդրեասյանի առաջարկով՝ կստեղծվի աշխատանքային խումբ, որի աշխատանքի արդյունքում փաստաթուղթը կստանա ամբողջական տեսք՝ ամրապնդելով դպրոց-բուհ կապը:

«Բուհի ռազմավարության տեսանկյունից՝ Հոգաբարձուների խորհուրդն ունի առանցքային դեր: Մենք պարտավորված ենք աջակցել, և չպետք է հաստատենք փաստաթուղթ, որտեղ մանկավարժական բուհի օրվա կարևոր խնդիրները շատ ուղիղ ձևով արտացոլված չեն: Մենք պետք է սահմանենք թիրախ, որ առաջիկա տարիներին ավելացնենք ինչպես դիմորդների, այնպես էլ խնդրահարույց համարվող մասնագիտությամբ հետաքրքրվողների թիվը»,-նիստի ընթացքում նշեց Խորհրդի նախագահ Ժաննա Անդրեասյանն ու հավելեց՝ խորհրդի անդամներից յուրաքանչյուրն իր ղեկավարած կառույցի շրջանակներում իրականացվող ծրագրերում պետք է ընդգրկի Մանկավարժականն ու վերջինիս հետ հաստատի կայուն գործընկերություն:

Ժաննա Անդրեասյանը վստահ է՝ Մանկավարժականի հետ գործակցելը պետք է դարձնել կայուն վարքագիծ. այսօր աշխատելով բուհի հետ, վաղը կհեշտանա աշխատանքը դպրոցների, ուսուցչի հետ:

Խորհրդի անդամները որոշեցին բուհի Ռազմավարական ծրագրի հաստատումը տեղափոխել հաջորդ նիստին:

Հոգաբարձուների խորհուրդը հաստատեց նաև ՀՊՄՀ-ի վարժարանի մարզադահլիճի վերանորոգման աշխատանքների շարունակության թույլտվությունը, ապա քննարկեց կատարված գործառույթի իրավական գնահատականի վերաբերյալ մի շարք հարցեր:

Նիստում Խորհուրդը որոշեց ՀՊՄՀ-ի ռեկտորի պաշտոնի թափուր տեղի համար մրցույթի օրը. այն կանցկացվի մարտի 19-ին` ժամը 10:00-ին: