ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Առաջին բուժօգնություն, արտակարգ իրավիճակների և քաղպաշտպանության ամբիոնը հիմնադրվել է 1966 թվականին՝ Բժշկագիտության և արտակարգ իրավիճակներ անվամբ։

1990 թվականին ամբիոնը վերանվանվել է Քաղպաշտպանության և բժշկագիտության հիմունքներ, 2000 թվականին՝ Բժշկագիտության հիմունքներ և արտակարգ իրավիճակներ, 2012 թվականին՝ Առաջին բուժօգնության, արտակարգ իրավիճակների և քաղպաշտպանության:

1975-1995 թվականներին  ամբիոնը Խ. Աբովյանի անվան հայկական   մանակավարժական ինստիտուտի ուսանողներին տրամադրել է քաղպաշտպանության պահեստային բուժքրոջ որակավորմամբ վկայականներ:

Գործունեության 57 տարիների ընթացքում ամբիոնը ղեկավարել են գիտության դոկտորներ և պրոֆեսորներ՝ 1966-1982թթ.՝ բժշկական գիտությունների դոկտոր, պրոֆեսոր Ջ.Մ. Շմավոնյանը, 1982-1998թթ․ ՝ բժշկական գիտությունների դոկտոր, դոցենտ Մ.Մ.Ասատրյանը, 2001-2016թթ․՝ մանկավարժական գիտությունների թեկնածու  Հ.Մ. Գրիգորյանը,  2016-2018թթ․՝ բժշկական գիտությունների դոկտոր, պրոֆեսոր Ս.Վ.Գրիգորյանը։

2019 թվականից  մինչ օրս  ամբիոնը ղեկավարում  է  կենսաբանական գիտությունների դոկտոր, դոցենտ  Ն. Ա. Սահակյանը:

Բժշկագիտության  և քաղպաշտպանության ուղղությամբ ամբիոնը լուծում է  առողջության առաջնային պահպանման, քաղպաշտպանության կազմակերպման, ինչպես նաև տարաբնույթ աղետներին դիմակայելու,  արտակարգ իրավիճակների ժամանակ աղետների ռիսկերի նվազեցմանն ուղղված միջոցառումների կազմակերպման  հիմնահարցեր:

Ամբիոնը  համագործակցում է ՀՀ ՆԳՆ Ճգնաժամային կառավարման պետական ակադեմիայի,   համապատասխան ստորաբաժանումների  հետ:

Հիմնադրման օրից ամբիոնը համահամալսարանական է․ կարևորելով բժշկագիտության  և քաղպաշտպանության  դերը մանկավարժների    կոմպետենցիաների ձևավորման մեջ՝ կազմակերպում է համապատասխան մասնագիտական  դասընթացներ բոլոր ֆակուլտետներում։ 

2016 թվականին Կենսաբանության, քիմիայի և աշխարհագրության ֆակուլտետում գործող Մարդու և կենդանիների ֆիզիոլոգիայի ամբիոնը միավորվել է  Առաջին բուժօգնություն, արտակարգ իրավիճակներ և քաղպաշտպանության ամբիոնին, ինչի արդյունքում,  ուսումնակրթական գործառույթներն այժմ  իրականացվում են  հետևյալ ուղղություններով՝ ԱԲՕ, ԱԻ, ՔՊ և  Մարդու և կենդանիների ֆիզիոլոգիա:

Ամբիոնի գիտական, գիտահետազոտական գործունեությունը կապված  է մարդու և կենդանիների ֆիզիոլոգիայի հետ: Առկա գիտական ուղղություններն են՝ նեյրոֆիզիոլոգիա, էլեկտրաֆիզիոլոգիա և հոգեֆիզիոլոգիա:  Այս ուղղությամբ իրականացվում են  կիրառական  հետազոտություններ՝  ուսանողների և դպրոցականների ուշադրության,  հիշողության գործընթացների և մտավոր աշխատունակության մակարդակների ֆիզիոլոգիական և հոգեֆիզիոլոգիական հիմնախնդիրների ուսումնասիրության,  ուսումնական տարբեր  ծանրաբեռնվածությունների պայմաններում:

Առանցքային գիտական  ուղղություն է համարվում նաև սթրեսոլոգիան, մասնավորապես՝  հոգեհուզական և ինֆորմացիոն սթրեսների  նեյրոդինամիկ  բնութագրերի բացահայտման մեխանիզմների ուսումնասիրությունը: Այս ուղղությամբ ամբիոնը համագործակցում է  ՀՀ ԳԱԱ Օրբելու անվան ֆիզիոլոգիայի ինստիտուտի հետ:

Ամբիոնի դասախոսական կազմում ընդգրկված են գիտությունների 1 դոկտոր, 1 պրոֆեսոր, 5 թեկնածու-դոցենտներ:

Պրոֆեսորադասախոսական կազմը  հրատարակում է մենագրություններ, ուսումնամեթոդական ձեռնարկներ, դասագրքեր,  մեթոդական ուղեցույցներ և գիտական  հոդվածներ:

Ամբիոնի մասնագետները պարբերաբար զեկուցումներով հանդես են գալիս  տարբեր միջազգային գիտաժողովներում, մասնակցում առցանց սեմինարների, վեբինարների և մասնագիտական քննարկումների:

Կանոնադրություն