ՀՊՄՀ Հայոց պատմության ամբիոնի վարիչի պաշտոնակատար, պրոֆեսոր Էդիկ Գևորգյանը, ՀՀ ԳԱԱ ակադեմիկոս, նույն ամբիոնի պրոֆեսոր Աշոտ Մելքոնյանը և ՀՊՄՀ Համաշխարհային պատմության և նրա դասավանդման մեթոդիկայի ամբիոնի վարիչ, պրոֆեսոր Խաչատուր Ստեփանյանը հոկտեմբերի 10-16-ը մասնակցեցին Ռուսաստանի Դաշնության Ստավրոպոլ քաղաքում գտնվող Հյուսիս-Կովկասյան դաշնային համալսարանի կազմակերպած միջազգային գիտագործնական համաժողովին։

Համաժողովի շրջանակում անցկացվեց երկու գիտական միջոցառում։ Առաջինը պատմաբանների և կովկասագետների միջազգային գիտաժողովն էր՝ «Կովկասի ժողովուրդները XVIII-XXI դարերում. պատմություն, քաղաքականություն, մշակույթ» խորագրով։

Գիտաժողովում Աշոտ Մելքոնյանը և Էդիկ Գևորգյանը հանդես եկան համատեղ զեկուցմամբ՝ «Հայաստանը և հայերը Ռուսական կայսրության ժողովրդագրական քաղաքականության համատեքստում XIX դարի առաջին քառորդին» թեմայով։ Խաչատուր Ստեփանյանը ներկայացրեց «Հայաստանի և Սփյուռքի փոխհարաբերությունները 1918-1920 թթ.» զեկուցումը։

ՀՊՄՀ ներկայացուցիչները մասնակցեցին նաև «Ռուսաստանը և Անդրկովկասի ժողովուրդները» խորագրով միջազգային գիտագործնական համաժողովին։ Դրա շրջանակում քննարկվեցին տարածաշրջանի պատմական փորձին, առկա մարտահրավերներին, ինչպես նաև տնտեսական և սոցիալ-մշակութային խնդիրներին առնչվող հարցեր։

Համաժողովում ակադեմիկոս Աշոտ Մելքոնյանը ներկայացրեց կազակական զորամասերի մասնակցությանը 1804-1813 և 1826-1828 թթ. ռուս-պարսկական պատերազմների ընթացքում Արևելյան Հայաստանում ծավալվող ռազմական գործողություններին վերաբերող զեկուցում։

Էդիկ Գևորգյանը հանդես եկավ «Ազգային փոքրամասնությունների վերաբնակեցումը Խորհրդային Հայաստանում 1920-1926 թթ. և ազգային փոքրամասնությունների վերաբնակեցումը Արևելյան Հայաստանում 1920-1926 թթ.» թեմայով զեկուցմամբ, իսկ Խաչատուր Ստեփանյանը ներկայացրեց «Թուրքական հակապետական խռովությունները Հայաստանի Հանրապետությունում 1918-1920 թթ.» զեկուցումը։

Գիտաժողովին զեկուցումներով հանդես եկան նաև Վրաստանից, Աբխազիայից, Դաղստանից, Կաբարդինո-Բալկարիայից, Չեչնիայից, Մոսկվայից և Սանկտ Պետերբուրգից ժամանած պատմաբաններ ու կովկասագետներ։

Ինչպես նշեցին համաժողովի մասնակիցները, միջոցառումը ոչ միայն պատմաբանների և կովկասագետների, այլև տարածաշրջանային հիմնախնդիրներով զբաղվող մասնագետների կարևոր հարթակ էր։ Այն հնարավորություն ընձեռեց քննարկելու բազմաբնույթ հարցեր՝ կապված տարածաշրջանի մարտահրավերների, պատմական փորձի, տնտեսական զարգացումների և սոցիալ-մշակութային գործընթացների վերաբերյալ։

Հոկտեմբերի 14-16-ը Հյուսիս-Կովկասյան դաշնային համալսարանում անցկացվեց նաև ամառային դպրոց, որին մասնակցեցին ՀՊՄՀ Պատմության և հասարակագիտության ֆակուլտետի երկու ուսանող։

Ամառային դպրոցի աշխատանքներին ակտիվորեն մասնակցեցին նաև ակադեմիկոս Աշոտ Մելքոնյանը և պրոֆեսոր Խաչատուր Ստեփանյանը՝ հանդես գալով դասախոսություններով։