Մանկավարժական համալսարանի ռեկտորի ժամանակավոր պաշտոնակատար Լիլիթ Մկրտչյանը համագործակցության հուշագիր ստորագրեց Կապանի Արվեստի պետական քոլեջի տնօրեն Աշոտ Խաչատրյանի հետ։

Վերջինս փաստեց՝ Մանկավարժական համալսարանի հետ քոլեջը տարիների համագործակցության պատմություն ունի, և իրենց շրջանավարտներից շատերը կրթությունը շարունակում են այս համալսարանում։ Նա խոսեց քոլեջը մասնագիտական կադրերով համալրելու անհրաժեշտության մասին,   կարևորեց  սերնդափոխությունը և այդ համատեքստում` Մանկավարժական համալսարանի հետ համագործակությունը։ 

Նախորդ տարի քոլեջի 60-ամյակն են տոնել․ Կապանի արվեստի քոլեջի գործունությունն ու պատմությունն է ներկայացնում քոլեջի տնօրենը՝ ընդգծելով, որ այդ ուսումնական հաստատությունում շատ երևելի արվեստագետներ են դասավանդել։

Լիլիթ Մկրտչյանը կրթության շարունակականության ու բարելավման իմաստով կարևորեց համագործակցությունը՝ վստահեցնելով՝ եղած կապերը հուշագրով կամրագրեն և ավելի կընդլայնեն, կիրականացնեն ուսանող-դասախոս ճանաչողական փոխայցելություններ։

Աշոտ Խաչատրյանը հատկապես կարևորեց քոլեջի կադրային խնդիրների լուծումը՝ ակնկալելով համալսարանի կողմից  մասնագիտական ու մեթոդական աջակցության  տրամադրումը։

Հանդիպմանը ներկա էին Ուսումնական գործընթացների հարցերով պրոռեկտոր Նաիրա Սաֆարյանը, Պրակտիկայի և կարիերայի կենտրոնի ղեկավար Հասմիկ Առաքելյանը, Գեղարվեստական կրթության ֆակուլտետի դեկան Արա Հակոբյանը և փոխդեկանները։  

Ըստ հուշագրի՝ համալսարանը և քոլեջը կհամագործակցեն  ուսումնական պլանների և  առարկայական  ծրագրերի համատեղ  վերանայման և համաձայնեցման շրջանակում,  շրջանավարտների որակավորման քննություններին այսուհետև կմասնակցեն համալսարանի  համապատասխան մասնագիտությունների  առաջատար մասնագետները, միաժամանակ արվեստի մի շարք մասնագիտությունների գծով քոլեջի բարձր առաջադիմությամբ շրջանավարտները հնարավորություն կունենան համապատասխան մասնագիտությունների գծով կրթությունը շարունակելու բուհի 2-րդ կուրսում։ Բացի այդ, համալսարանը քոլեջին աջակցություն կցուցաբերի`  մասնագիտական ու մեթոդական, ինչպես նաև գիտահետազոտական ու հրատարակչական  գործընթացներում։