Սիրելի՛ երիտասարդներ,

Ջերմորեն շնորհավորում եմ ձեզ Երիտասարդների միջազգային օրվա առիթով։

Երիտասարդությունը հնարավորությունների, նոր գաղափարների, որոնումների, համարձակ որոշումների և փոփոխություններ անելու մեծ ներուժի մասին է։ Հենց երիտասարդներն են իրենց գիտելիքներով, ստեղծագործ մտքով, նորարարական մոտեցումներով և ակտիվ մասնակցությամբ ձևավորում վաղվա հասարակությունն ու պետությունը։

Այս օրը ևս մեկ առիթ է արժևորելու երիտասարդների ներուժը, նրանց ձայնը, գաղափարներն ու ձգտումները։ Յուրաքանչյուր երիտասարդ իր մեջ ունի յուրահատուկ կարողություններ, և կարևոր է ոչ միայն բացահայտել դրանք, այլև համարձակորեն զարգացնել ու ծառայեցնել սեփական, համայնքի և երկրի առաջընթացին։

Այսօր ուզում եմ ձեզ մաղթել ոչ միայն մեծ ու գեղեցիկ երազանքներ, այլև համարձակություն՝ դրանք նպատակների վերածելու, հաստատակամություն՝ դրանց հասնելու և պատրաստակամություն՝ շարունակաբար սովորելու ու զարգանալու։

Փնտրե՛ք ձեր տեղն ու դերը կյանքում, եղե՛ք հետաքրքրասեր, բացե՛ք նոր հնարավորությունների դռներ, զարգացրե՛ք ձեր կարողություններն ու հմտությունները և երբեք մի՛ դադարեք հավատալ ինքներդ ձեզ ու ձեր ուժերին։

Մի՛ վախեցեք փորձելուց, սխալվելուց և նորից սկսելուց։ Կյանքում յուրաքանչյուր փորձ, յուրաքանչյուր դժվարություն և նույնիսկ յուրաքանչյուր անհաջողություն կարող է դառնալ կարևոր դաս և նոր հնարավորություն՝ ավելի ուժեղ, ավելի գիտակից ու ավելի նպատակասլաց դառնալու համար։

Հիշե՛ք՝ ապագան ստեղծվում է այսօր՝ ձեր ընտրությամբ, ձեր աշխատանքով, ձեր գիտելիքով, ձեր նախաձեռնություններով և ձեր պատասխանատվությամբ։ Ձեր ձեռքերում է ոչ միայն ձեր, այլև այն հասարակության ու երկրի ապագան, որտեղ ցանկանում եք ապրել ու արարել։

Մանկավարժական համալսարանի մեծ ընտանիքի անունից մաղթում եմ ձեզ համարձակություն՝ նոր գաղափարներ առաջ քաշելու և առաջնորդելու, ուժ՝ շարունակաբար զարգանալու ու դժվարությունները հաղթահարելու, և հավատ՝ ձեր նպատակներն ու երազանքները իրականություն դարձնելու համար։

Թող ձեր երիտասարդական տարիները լինեն գիտելիքի, ինքնաբացահայտման, ընկերության, ստեղծագործ աշխատանքի և կարևոր ձեռքբերումների տարիներ։ Թող յուրաքանչյուրիդ ճանապարհին լինեն մարդիկ, ովքեր կոգեշնչեն, կաջակցեն և կօգնեն հավատալ սեփական հնարավորություններին։

Շնորհավո՛ր Երիտասարդների միջազգային օրը։

Լիլիթ Մկրտչյան
ՀՊՄՀ ռեկտորի ժամանակավոր պաշտոնակատար