COP17 բնապահպանական գագաթնաժողովի շրջանակում ՀՊՄՀ շուրջ 200 ուսանող և դասախոսական կազմի ներկայացուցիչներ սեպտեմբերի 26-ին մասնակցեցին բնապահպանական նախաձեռնության՝ Երևանյան լճի ափամերձ տարածքներն ու դրանց հարակից հատվածները կենցաղային աղբից մաքրելու նպատակով։

Նախաձեռնությունը համախմբել էր ՀՊՄՀ տարբեր ստորաբաժանումների և համալսարանական համայնքի ներկայացուցիչներին՝ բնապահպանական պատասխանատվությունը գործնականում ընդգծելու և շրջակա միջավայրի նկատմամբ հոգատարության մշակույթը խթանելու նպատակով։

Շաբաթօրյակի ընթացքում համալսարանականները ոչ միայն մաքրեցին տարածքը, այլև ծանոթացան Երևանյան լճի կենսաբազմազանությանը։ Ուսանողները մասնագետների ուղեկցությամբ ուսումնասիրեցին լճում և հարակից տարածքներում հանդիպող թռչնատեսակները, երկկենցաղներին ու սողուններին՝ հնարավորություն ստանալով բնապահպանական գիտելիքները կիրառել իրական միջավայրում։

Միջոցառումը կարևորել էր նաև բնապահպանական կրթության և քաղաքացիական պատասխանատվության փոխկապակցվածությունը։ Շաբաթօրյակին մասնակցեցին նաև ՀՊՄՀ շրջանավարտներ և կամավորներ։ Ի դեպ, ուսանողների կամավորական աշխատանքը կներառվի կամավորության միավորների հաշվառման շրջանակում։

Շաբաթօրյակի կազմակերպմանն ու իրականացմանն աջակցել են Երևանի քաղաքապետարանը, Շենգավիթի համայնքապետարանը և «Սոլուտոն» կազմակերպությունը։

Ինչպես նշեցին մասնակիցները՝ COP17-ի շրջանակում իրականացվող նախաձեռնությունը ևս մեկ անգամ ընդգծեց բնապահպանական խնդիրների շուրջ հանրային իրազեկման, կրթության և գործնական մասնակցության կարևորությունը։