Մանկավարժական համալսարանը հյուրընկալեց Միջազգային ակադեմիական կենտրոնի ներկայացուցիչներին՝ կենտրոնի ղեկավար Միհե Լիի գլխավորությամբ։

Հյուրերին ընդունեց ՀՊՄՀ ռեկտորի պաշտոնակատար Լիլիթ Մկրտչյանը։ Հանդիպման ընթացքում քննարկվեցին կրթության, ակադեմիական փոխանակման և հետազոտությունների ոլորտներում համագործակցության հնարավորությունները։

Միհե Լին ներկայացրեց կենտրոնի գործունեությունը՝ նշելով, որ կառույցը համագործակցում է ավելի քան 100 համալսարանի հետ և պատրաստ են ՀՊՄՀ-ի հետ քննարկել տարբեր ուղղություններով համագործակցության հնարավորությունները։ Ընդգծվեց այս փուլում ՀՊՄՀ երկու ուսանողի անվճար ուսումնառությունը կորեական համալսարաններում իրականացնելու հնարավորությունը։

Կենտրոնի ներկայացուցիչը նաև հետաքրքրված էր կորեացի ուսանողների համար ՀՊՄՀ-ում հայոց լեզվի և անգլերենի ուսումնառության հնարավորությամբ։

Լիլիթ Մկրտչյանը նշեց, որ ՀՊՄՀ-ն շահագրգռված է ինչպես օտարերկրյա ուսանողների ներգրավմամբ, այնպես էլ ուսանողների և դասախոսների փոխանակման, համատեղ հետազոտությունների և կրթական ծրագրերի իրականացման ուղղություններով։ Նա ընդգծեց նաև համալսարանի փորձը լեզուների դասավանդման ոլորտում։

Հանդիպման շրջանակներում Միջազգային ակադեմիական կենտրոնի ներկայացուցիչները հանդիպեցին ՀՊՄՀ ուսանողների հետ և ներկայացրին Հարավային Կորեայում բարձրագույն կրթություն ստանալու հնարավորություններն ու միջազգային ակադեմիական միջավայրում ուսումնառության հեռանկարները։

Ուսանողները տեղեկացան փոխանակման և միջազգային կրթական ծրագրերի, կրթաթոշակային հնարավորությունների, Կորեայում ուսումնառության կազմակերպման պայմանների, մասնագիտությունների մասին։