ՀՊՄՀ Մանկավարժության ամբիոնի նախաձեռնությամբ անցկացվեց «Հուզական բարօրությունը՝ ակադեմիական առաջընթացի նախապայման» խորագրով սեմինարը։ Այն վարեց Մանկավարժության ամբիոնի դասախոս Անի Մկրտչյանը։

Սեմինարին մասնակցում էին Մանկավարժության ամբիոնի դասախոսներ և ուսանողներ, ասպիրանտներ, հայցորդներ, ինչպես նաև ավագ դպրոցի ուսուցիչներ։

Մանկավարժության ամբիոնի վարիչ, պրոֆեսոր Աիդա Թոփուզյանը, կարևորելով թեմայի արդիականությունը, ընդգծեց հուզական բարօրության, անվտանգ կրթական միջավայրի և սովորողի ակադեմիական առաջընթացի փոխկապակցվածությունը։

Սեմինարի ընթացքում Անի Մկրտչյանն անդրադարձավ սոցիալ-հուզական ուսումնառությանը, դրա հիմնարար սկզբունքներին, հոգեբանական կարիքներին, մոտիվացիայի տեսակներին և կրթական միջավայրի ազդեցությանը սովորողի զարգացման վրա։

Ներկայացնելով կանադացի զարգացման հոգեբան Ջորդան Նյուֆելդի մոտեցումը, որ զարգացումը տեղի է ունենում հանգստության կետից, բանախոսը նշեց՝ երեխայի զարգացման գործընթացը հնարավոր չէ լիարժեք հասկանալ՝ անտեսելով նրա ներքին աշխարհում տեղի ունեցող գործընթացները։

Ինչպես նկատեց Անի Մկրտչյանը՝ դպրոցներում հաճախ մեծ ուշադրություն է դարձվում դասագրքերին, ֆիզիկական ենթակառուցվածքներին, ուսուցիչների վերապատրաստմանը և կրթական այլ բաղադրիչներին, մինչդեռ նույնքան կարևոր է հասկանալ, թե ինչ է տեղի ունենում երեխայի և ուսուցչի ներաշխարհում․«Երբ չենք ստեղծում բարօրության և անվտանգության միջավայր, այդ պայմաններում կիրառվող մյուս գործիքներն ու փոփոխությունները դառնում են երկրորդական»,- ընդգծեց նա։

Բանախոսը ներկայացրեց նաև իր մասնագիտական փորձը՝ կարևոր փուլերից մեկը համարելով «Սերունդ» ծրագիրը, որի հիմքում սոցիալ-հուզական ուսումնառությունն է։

Անի Մկրտչյանը ներկայացրեց իր իրականացրած ուսումնասիրության արդյունքը, ըստ որի, ծնողների 87 տոկոսը նշել է, որ ապահով դպրոցական միջավայրն ազդել է երեխայի՝ դպրոցի նկատմամբ ունեցած վերաբերմունքի վրա և խթանել է նրա մոտիվացիան։

Անի Մկրտչյանը շեշտեց նաև՝ դպրոցում անվտանգ միջավայրի ձևավորումը պետք է վերաբերի կրթական գործընթացի բոլոր մասնակիցներին՝ սովորողներին, ուսուցիչներին, ծնողներին և դպրոցի մյուս աշխատակիցներին։

Քննարկման ընթացքում կարևորվեց նաև հաղորդակցությունը՝ որպես անվտանգ և աջակցող միջավայրի ձևավորման առանցքային բաղադրիչ։