Մանկավարժական համալսարանում ամփոփվեց «Պատմությունը երգերում» երիտասարդ պատմաբանների ամառային դպրոցը, որն իրականացվեց Հայագիտական հետազոտությունները ֆինանսավորող համահայկական հիմնադրամի աջակցությամբ։

Գործող ուսուցիչներն ու ուսանողները հնարավորություն ունեցան մասնակցելու թեմատիկ դասախոսությունների, քննարկումների և գործնական աշխատանքների՝ ուսումնասիրելով պատմության դասավանդման այլընտրանքային մոտեցումներ։

Ամառային դպրոցն իրականացվեց երեք փուլով։ Առաջին՝ տեսական փուլում, մասնակիցները լսեցին թեմատիկ դասախոսություններ և ստացան գործնական առաջադրանքներ։ Երկրորդ փուլում նրանք ինքնուրույն և առցանց աշխատանքի միջոցով մշակեցին դասի պլաններ՝ օգտվելով նաև խորհրդատվությունից։

Այսօր կայացած ամփոփիչ փուլում մասնակիցները ներկայացրին իրենց մշակած դասի պլանները՝ ցուցադրելով ձեռք բերած գիտելիքները գործնականում կիրառելու կարողությունները։

«Ամառային դպրոցը ծառայել է իր նպատակին՝ մասնակիցներին հնարավորություն տալով ոչ միայն ձեռք բերել նոր գիտելիքներ, այլև դրանք կիրառել գործնական աշխատանքներում, զարգացնել պատմության դասավանդման հմտությունները և բացահայտել երգը՝ որպես ուսումնական գործընթացում պատմական նյութի ուսումնասիրման ու վերլուծության արդյունավետ միջոց»,- նկատեց Համաշխարհային պատմության և նրա դասավանդման մեթոդիկայի ամբիոնի վարիչ, պրոֆեսոր Խաչատուր Ստեփանյանը։

Ծրագրի ավարտին մասնակիցներին տրվեցին հավաստագրեր։