Այսօր «Նախադպրոցական ուսումնական հաստատության մանկավարժական աշխատողների  և դաստիարակի օգնականի պարտադիր վերապատրաստման» դասընթացի 70 մասնակից  ստացավ հավաստագիր։

90 ակադեմիական ժամ տևողությամբ դասընթացն անցկացվել է դեկտեմբերի 8-22-ը․ գործընթացը ներառել է նախադպրոցական կրթության բնագավառի օրենսդրություն, ՏՀՏ-ի կիրառումը կրթական գործընթացում, տարիքային հոգեբանություն, համընդհանուր ներառում, նախադպրոցական դաստիարակության մեթոդիկաներ, 21-րդ դարի  հմտություններ, հետազոտական աշխատանք կատարելու սկզբունքներ։

ՀՊՄՀ ռեկտորի ժամանավոր պաշտոնակատար Լիլիթ Մկրտչյանը շնորհավորեց դասընթացը հաջողությամբ ավարտած մասնակիցներին և հույս հայտնեց, որ նրանք գոհ են այն արդյունքներից, իմացությունից, հմտություններից և փորձառությունից, որ ձեռք են բերել  կյանքի կարևոր փուլում Մանկավարժականի հետ միասին՝ ուժեղացնելով նաև մասնագիտական տիրույթում ունեցած կապերը․ «Ցանկացած նոր փուլ մի նոր իրողության սկիզբ է․ ընդունեք և բաց եղեք դրանց առաջ՝ դիտարկելով  արժեք, ուժեղանալու և խնդրից դուրս գալու հնարավորություն»։

Լիլիթ Մկրտչյանը նշեց՝ նախադպրոցական տարիքն ամենակարևորն է․ մասնակիցներն էլ  կրթության ոլորտի ամենակարևոր մարդիկ, ովքեր իրականացնում են առողջ երեխա դաստիարակելու կարևոր առաքելությունը։

Մասնակիցները գոհունակություն հայտնեցին վերապատրաստումների վերաբերյալ և վստահեցրին՝  վերապատրաստող փորձառու թիմի աշխատանքի, բանիմաց և գրագետ մասնագետների  շնորհիվ լրացրեցին մասնագիտական կարողությունների բացը։

Նախադպրոցական մանկավարժության և մեթոդիկաների ամբիոնի վարիչի պաշտոնակատար Արմենուհի Մանուկյանը վստահեցրեց՝ բուհն անում է հնարավորինը՝ գործընթացը լավարկելու և զարգացնելու համար։