Ողջունելով ներկաներին՝ ՀՊՄՀ ռեկտորի ժամանակավոր պաշտոնակատար Լիլիթ Մկրտչյանը կարևորեց, որ ծրագրի ամփոփիչ միջոցառումն անցկացվում է հենց Մանկավարժական համալսարանում՝ համարելով մեծ պատասխանատվություն և պատիվ։

Նրա խոսքով՝ նախաձեռնությունն առանցքային նշանակություն ունի Հայաստանի կրթական համակարգի համար, իսկ դրա իրականացման գործում առանձնահատուկ նշանակություն ունի ՅՈՒՆԻՍԵՖ-ի և գործընկեր կազմակերպությունների համագործակցությունն ու աջակցությունը․«Որպես մանկավարժներ և կրթության կազմակերպիչներ՝ մենք քաջ գիտակցում ենք, որ ժամանակակից մանկավարժությունը, որքան էլ հիմնված լինի արժեքների կրթության, ակտիվ երկխոսության և համագործակցային մեթոդների վրա, չի կարող լիարժեք արդյունավետ լինել առանց սովորողների հոգեկան բարեկեցության ապահովման»,- նշեց Լիլիթ Մկրտչյանը։

Ռեկտորի ժամանակավոր պաշտոնակատարի խոսքով՝ ապագա ուսուցիչների պատրաստման, դպրոցական առարկաների դասավանդման և կրթական ծրագրերի բարեփոխումների գործընթացում համալսարանը մշտապես կարևորում է ինքնության ձևավորումը, միջմշակութային հաղորդակցությունը, առողջ փոխհարաբերությունների զարգացումն ու կայուն արժեհամակարգի ձևավորումը․ «Վստահ եմ, որ այսօրվա քննարկումները նոր խթան կհաղորդեն երեխաների հոգեկան առողջության պահպանման և հոգեսոցիալական աջակցության ոլորտում իրականացվող աշխատանքներին՝ նպաստելով առավել արդյունավետ համագործակցությանն ու նոր նախաձեռնությունների ձևավորմանը՝ հանուն մեր երեխաների առողջ և լուսավոր ապագայի»,- ընդգծեց Լիլիթ Մկրտչյանը։

ՀՀ ԿԳՄՍ նախարարի տեղակալ Արաքսիա Սվաջյանը նշեց, որ միջոցառումը կարևոր է ոչ միայն որպես ծրագրի ամփոփում, այլև որպես կրթական համակարգում հոգեկան առողջության և հոգեսոցիալական աջակցության ուղղությամբ իրականացվելիք նոր նախաձեռնությունների շարունակություն։

Նրա խոսքով՝ ժամանակակից աշխարհում երեխաները բախվում են բազմաթիվ մարտահրավերների, ուստի կրթական հաստատությունները կարևոր դեր ունեն նրանց հոգեկան բարեկեցության, սոցիալական զարգացման և հոգեսոցիալական տոկունության ձևավորման գործում։ «Ապրում ենք մի ժամանակաշրջանում, երբ երեխաները բազմաթիվ մարտահրավերների առջև են կանգնած։ Հենց այդ պատճառով մեր առաջնային խնդիրն է նրանց պատրաստել այդ իրողություններին, զարգացնել նրանց տոկունությունն ու կարողությունները»,- նշեց նախարարի տեղակալը։

Արաքսիա Սվաջյանը կարևորեց նաև կրթական հաստատություններում հոգեբանական ծառայությունների կանխարգելիչ դերը. «Մեր խնդիրն է կրթական հաստատություններում հոգեբանական ծառայությունները կազմակերպել այնպես, որ դրանք չսահմանափակվեն միայն արդեն իսկ խնդիրներ ունեցող երեխաներին աջակցելով։ Դրանք պետք է ունենան կանխարգելիչ ուղղվածություն՝ ընդգրկելով բոլոր երեխաներին և առաջնահերթ ուշադրություն դարձնելով նրանց հոգեսոցիալական զարգացմանն ու տոկունության ձևավորմանը։ Այս կարողություններն այսօր անհրաժեշտ են յուրաքանչյուրին»։

Ողջույնի խոսքով հանդես եկան նաև Հանրապետական մանկավարժահոգեբանական կենտրոնի տնօրեն Լիլիթ Մնացականյանը և ՅՈՒՆԻՍԵՖ-ի ներկայացուցչի պաշտոնակատար Սիլվիա Մեստրոնին։ Վերջինս շնորհակալություն հայտնեց ծրագրի բոլոր գործընկերներին՝ առանձնահատուկ ընդգծելով Մանկավարժական համալսարանի դերը և նշելով, որ այն կրթության ոլորտի կարևորագույն մասնագիտական միջոցառումների և քննարկումների հարթակներից մեկն է։

Միջոցառման ընթացքում անցկացվեց «Հոգեկան առողջությունը և հոգեսոցիալական աջակցությունը կրթական համակարգում. ձեռքբերումներ, մարտահրավերներ և զարգացման հեռանկարներ» թեմայով պանելային քննարկումը, ներկայացվեցին ծրագրի պիլոտային արդյունքները, «Երեխաների հոգեկան առողջության խթանում և հոգեսոցիալական տոկունության բարձրացում» ձեռնարկը, ինչպես նաև դպրոցականների կողմից իրականացված նախագծերը, որոնք նվիրված էին ներառականությանը, հուզական ինտելեկտի զարգացմանն ու ինքնավստահության ձևավորմանը։

Ամփոփիչ միջոցառման ավարտին շնորհակալագրեր հանձնվեցին ծրագրի դեսպան դպրոցներին և մանկապարտեզներին։