Մանկավարժական համալսարանում մեկնարկեց «Նախադպրոցական մանկավարժության, հոգեբանության և ուսումնամեթոդական հմտություններ» մոդուլով 20 կրեդիտով մանկավարժի հավաստագրման դասընթացը։

Հունիսի 2-ից օգոստոսի 10-ը նախատեսված դասընթացին կմասնակցի 101 վերապատրաստվող՝ ինչպես մայրաքաղաքից, այնպես էլ հանրապետության տարբեր մարզերից։

Դասընթացի առաջին օրը մասնակիցներին ողջունեց ՀՊՄՀ ռեկտորի ժամանակավոր պաշտոնակատար Լիլիթ Մկրտչյանը՝ ընդգծելով, որ պարտավորեցնող է համարում մասնակիցների կողմից Մանկավարժականի փորձառու և արհեստավարժ թիմի ընտրությունը։

Նա խոսեց ժամանակակից աշխարհում մրցունակ մասնագետ լինելու նախապայմանների, կրթական բարեփոխումների և այդ գործընթացների ակտիվ մասնակիցը դառնալու կարևորության մասին և մասնակիցներին խորհուրդ տվեց պատասխանատվությամբ մոտենալ ուսուցմանը, համագործակցել միմյանց հետ և փոխանակվել մասնագիտական փորձով։

Լիլիթ Մկրտչյանն անդրադարձավ նաև նախադպրոցական տարիքի առանձնահատուկ նշանակությանը, քանի որ հենց այդ փուլում են ձևավորվում երեխայի արժեքային համակարգի հիմքերը։

Նա կարևորեց համայնքների զարգացման գործում նախադպրոցական կրթության դերը և ձեռք բերած գիտելիքները գործնականում կիրառելու անհրաժեշտությունը։

«Ձեր հաջողված փորձը կնպաստի ոչ միայն կրթական գործընթացի բարելավմանը, այլև մեր պետության զարգացմանը։ Յուրաքանչյուր կարևոր փոփոխություն սկսվում է կրթությունից, իսկ կրթության հիմքում մանկավարժն է»,- նշեց նա։

Նախադպրոցական մանկավարժության և մեթոդիկաների ամբիոնի վարիչի պաշտոնակատար Արմենուհի Մանուկյանը, անդրադառնալով դասընթացին, նշեց, որ երկրորդ փուլի մասնակիցների մեծ թիվը լավագույն վկայությունն է նախորդ դասընթացների արդյունավետության և վստահության աճի։

Նրա խոսքով՝ Մանկավարժական համալսարանի մասնագիտական թիմը նույն նվիրվածությամբ, պատրաստակամությամբ և բարեհամբույր վերաբերմունքով կշարունակի իր առաքելությունը՝ աջակցելով մասնակիցների մասնագիտական գիտելիքների, հմտությունների զարգացմանը, նպաստելով նախադպրոցական կրթության ոլորտի մասնագետների շարքի համալրմանը։

Նախադպրոցական մանկավարժության և մեթոդիկաների ամբիոնի պրոֆեսոր Սվետլանա Մարությանը ևս շնորհավորեց մասնակիցներին՝ պատասխանատու և կարևոր գործընթացի մաս դառնալու առթիվ։

Նա վստահություն հայտնեց, որ դասընթացը կնպաստի ոչ միայն մասնագիտական գիտելիքների հարստացմանն ու մանկավարժական կարողությունների զարգացմանը, այլև կխորացնի մասնակիցների սերն ու նվիրվածությունը ընտրած մասնագիտության նկատմամբ։