Խաչատուր Աբովյանի անվան Հայկական պետական մանկավարժական համալսարանը, ՀՊՄՀ մետափիլիսոփայության, փաստարկման և հայագիտության միջազգային ինստիտուտը, Հայոց փիլիսոփայական ակադեմիան, Փիլիսոփայական ընկերությունների միջազգային դաշնությունը (FISP) և Ամերիաբանկ ՓԲԸ-ն  հունիսի 26-27-ը կազմակերպում են «ԿՐԹՈՒԹՅՈՒՆԸ ԵՎ ՓԻԼԻՍՈՓԱ-ՅՈՒԹՅՈՒՆԸ» թեմայով միջազգային գիտաժողով` նվիրված ակադեմիկոս Գեորգ Բրուտյանի ծննդյան 100-ամյակին 

Գիտաժողովին մասնակցում են Փիլիսոփայական ընկերությունների միջազգային դաշնության (FISP) նախագահության 33 անդամ` ովքեր նշանավոր փիլիսոփաներ են աշխարհի տարբեր երկրներից: Գիտաժողովի շրջանակներում բաց ելույթներով հանդես կգան FISP-ի նախագահ Հիսուկ Կիմը, FISP-ի նախորդ նախագահ Լուկա Սկարանտինոն (նախագահ` 2020-2024 թթ.) և պատվավոր նախագահ Դերմոտ Մորանը (նախագահ` 2013-2018 թթ.):

Գիտաժողովի շրջանակներում FISP-ի նախագահությունը կազմակերպում է կլոր սեղան` «Մշակութային ինքնության մարտահրավերները» թեմայով (համակարգող` Վիլհելմ Դանկա), որին մասնակցում են ՖԻՍՊ-ի 4, հայաստանցի` 1 փիլիսոփա:

Գիտաժողովի թեմատիկ ուղղություններն են՝ փիլիսոփայությունը, կրթությունը, հոգեբանությունը և սոցիոլոգիան, որոնց հիմնախնդիրները կդիտարկվեն զուգահեռաբար աշխատող հետևյալ մասնաճյուղերում`

Մասնաճյուղ 1. Փիլիսոփայական գիտելիքի զարգացման հեռանկարները կրթության մեջ. քննական, վերլուծական, ստեղծարար մտածողության ուսուցման հիմնախնդիրներ (Տիգրան Մեծի պող., 17, ՀՊՄՀ գլխավոր մասնաշենք, 3-րդ հարկ, Գիտխորհրդի դահլիճ):

Մասնաճյուղ 2․ Արհեստական բանականությունը ժամանակակից կրթության օրակարգում․ մանկավարժական մարտահրավերներ, ռազմավարություններ և լավագույն փորձ (Տիգրան Մեծի պող., 17, ՀՊՄՀ գլխավոր մասնաշենք, 4-րդ հարկ, 406 լսարան):

Մասնաճյուղ 3. Հոգեբանության արդի հիմնախնդիրները կրթության ոլորտում (Տիգրան Մեծի պող., 17, ՀՊՄՀ գլխավոր մասնաշենք, 3-րդ հարկ, Ռեկտորատի դահլիճ):

Մասնաճյուղ 4. Կրթության արդի խնդիրները սոցիոլոգիայի համատեքստում (Տիգրան Մեծի պող., 17, ՀՊՄՀ գլխավոր մասնաշենք, 3-րդ հարկ, Ակվարիումի սենյակ):

Գիտաժողովի զեկույցների հրատարակության երաշխավորված տեքստերը կհրատարակվեն WISDOM գիտական հանդեսում:

Գիտաժողովի հետ կապված այլ մանրամասներին կարելի է ծանոթանալ Հայոց փիլիսոփայական ակադեմիայի կայքէջում` https://apha.am/en/ ։

Օրակարգ

Ծրագիր