Խաչատուր Աբովյանի անվան հայկական պետական մանկավարժական համալսարանի ռեկտորի ժամանակավոր պաշտոնակատար Լիլիթ Մկրտչյանը և Արևելագիտության ինստիտուտի տնօրեն Գոհար Իսկանդարյանը Արևելագիտության ինստիտուտում կստորագրեն համագործակցության հուշագիր։ Փաստաթուղթը միտված է ամրապնդելու գիտության և կրթության ոլորտներում երկու հաստատությունների փոխգործակցությունը՝ խթանելով համատեղ գիտական, կրթական և հետազոտական ծրագրերի իրականացումը։ «Արևելագիտության ինստիտուտ»-ում նախատեսված են երկու կարևոր միջոցառումներ՝ ուղղված գիտակրթական համագործակցության զարգացմանը և մշակութային դիվանագիտության խթանմանը։

Այնուհետև տեղի կունենա եգիպտահայ անվանի ծաղրանկարիչ Ալեքսանդր Սարուխանին նվիրված միջազգային միջոցառում՝ «Երկու հայրենիքների միջև. Ալեքսանդր Սարուխանը և հանրային դիվանագիտության ուժը» խորագրով։

Միջոցառման ընթացքում կներկայացվեն Ալեքսանդր Սարուխանի ստեղծագործությունները, ինչպես նաև կքննարկվի նրա արվեստի և հասարակական գործունեության դերը մշակույթի միջոցով ժողովուրդների միջև երկխոսության, փոխըմբռնման և հանրային դիվանագիտության զարգացման գործընթացներում։

Հանդիպմանը մասնակցելու են եգիպտացի պատմաբաններ, մշակույթի գործիչներ ու լրագրողներ, ինչպես նաև հայ և եգիպտացի հետազոտողներ, դիվանագետներ և ակադեմիական համայնքի ներկայացուցիչներ։

Միջոցառման հիմնական բանախոսներն են՝ Խաչատուր Աբովյանի անվան հայկական պետական մանկավարժական համալսարան-ի դոցենտ Սաթենիկ Մելիքյանը, եգիպտացի ռեժիսոր Էսսամ Նագին, եգիպտացի պատմաբան, հայագետ Մուհամմադ Ռիֆաաթը և Նասերի անվան միջազգային առաջնորդության ծրագրում Հայաստանի ներկայացուցիչ Հակոբ Մակդիսը։

Միջոցառմանը մասնակցելու նպատակով Կահիրեից Երևան է ժամանելու նաև Ալեքսանդր Սարուխանի թոռնուհին՝ Սիլվա Ներետյան-Պլատյան, որը կներկայացնի Սարուխանի ժառանգության պահպանման և արժևորման արդի խնդիրները, ինչպես նաև արվեստագետի կյանքի և գործունեության վերաբերյալ անձնական հիշողություններ։
Միջոցառման աշխատանքային լեզուներն են հայերենը, անգլերենը և արաբերենը։