ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Օրերս ՀՊՄՀ «Սփյուռք» գիտաուսումնական կենտրոնում կայացավ պոլսահայ մտավորական Գևորգ Պ. Հակոբյանի (ԱՄՆ)՝ վերջերս լույս տեսած «Հայոց կրթական հաստատություններու պատմություն՝ Օսմանյան գավառներու մեջ» երկհատոր գրքի շնորհանդեսը:

Ստվարածավալ աշխատությունը շարունակությունն է «Պատմություն իսթանպուլահայ ուսումնական կյանքի և կրթական հաստատություններու» հատորի, ուր ներկայացված է պատմական Պոլիս քաղաքի վարչական շրջանների 170 հայ վարժարանների պատմությունը: Այս գրքում մինչև 1915 թվականը Օսմանյան կայսրության գավառների մեջ գործած մոտավորապես 1000 հայկական կրթական հաստատությունների և որբանոցների պատմությունն է․դրանցում ուսանում էին 120 հազար երկսեռ աշակերտներ՝ 5000-ի հասնող ուսուցիչներով։

Շնորհանդեսին ելույթ ունեցան և գիրքն արժևորեցին Վաչե Պարտիզունու անվան հայ նոր և նորագույն գրականության և նրա դասավանդման մեթոդիկայի ամբիոնի վարիչ, ՀՊՄՀ «Սփյուռք» գիտաուսումնական կենտրոնի տնօրեն, պրոֆեսոր Սուրեն Դանիելյանը, նույն ամբիոնի դոցենտ և կենտրոնի գիտական աշխատող Քնարիկ Աբրահամյանը, Մեսրոպ Մաշտոցի անվան Մատենադարանի գիտաշխատող, հատորի ցանկերի կազմող Վերա Սահակյանը, Բանասիրական ֆակուլտետի չորրորդ կուրսի ուսանողներ Սուսաննա Չարչյանն ու Անի Պապիկյանը:

Բանախոսներն իրենց ելույթներում ընդգծեցին տասնամյակների տքնաջան աշխատանքը, որ կատարել է հեղինակը՝ նյութը համակարգելու համար դիմելով ոչ միայն Պոլսո Հայոց Պատրիարքարանի և այլ հայկական աղբյուրների, այլև օսմանյան արխիվներին:

Նրանք ընդգծեցին՝ այս գրքերը վկայում են Օսմանյան կայսրության մեջ հայության կրթական հարուստ անցյալի մասին, ինչին հասու լինելը ուսանելի է ապագա մանկավարժների համար։ Բանախոսները նկատեցին՝ այն արժևորում է հայության մշակութային և հոգևոր ժառանգությունը, կարևոր դեր ունի ազգային ինքնության պահպանման, գիտական ուսումնասիրությունների հարստացման գործում և միաժամանակ վստահելի գիտական հենք է հետագա հետազոտությունների համար։

Շնորհանդեսի ավարտին շնորհակալական խոսք ասաց հեղինակը՝ Գևորգ Պ. Հակոբյանը՝ հիշատակելով գրքի խմբագիր Մաքրուհի Պ. Հակոբյանի բծախնդիր աշխատանքը, Պոլսի «Փարոս» պարբերաթերթի հրատարակչությանը՝ խմբագիր Մայտա Սարիսի առաջանորդությամբ, ելույթ ունեցողներին և ուրախություն հայտնեց ուսանողության ներկայության համար:

Բանասիրական ֆակուլտետի դեկան, պրոֆեսոր Աշոտ Գալստյանն իր խոսքում ընդգծեց՝ աշխատությունը կարևոր գիտական ներդրում է հայ կրթության պատմության ուսումնասիրության մեջ։

Միջոցառման ընթացքում երաժշտական կատարումներով հանդես եկան բուհի Գեղարվեստական կրթության ֆակուլտետի երաժշտական կրթության բաժնի առաջին կուրսի ուսանողներ Ալյոնա Գրիգորյանն ու Էրիկ Ալավերդյանը: