- Հայ
- Рус
- Eng
Էրազմուս+ «Հայաստանյան համալսարանների միջազգայնացման ռազմավարության և մարքեթինգի խթանում» (BOOST) ազգային ծրագրի շրջանակներում Հայաստանի ամերիկյան համալսարանում կայացավ աշխատաժողով:
Ձեռնարկի նպատակն էր ներկայացնել ծրագրի ընթացքը, արդյունքները և հետագա գործողությունները, ինչպես նաև իրականացնել միջծրագրային քննարկում հայաստանյան այլ համալսարանների կողմից իրականացվող Էրազմուս+ կարողությունների զարգացման ծրագրերի շրջանակներում:
Աշխատաժողովին մասնակցում էին ծրագրի հայաստանյան և եվրոպացի գործընկերներ, ինչպես նաև Հայաստանի մի շարք այլ բուհերի և կազմակերպությունների ներկայացուցիչներ:
Ողջույնի խոսքով հանդես եկանՀայաստանի ամերիկյան համալսարանի ռեկտոր Ռանդոլ Ռոդոսը, Էրազմուս+ գրասենյակի համակարգող Լանա Կառլովան: Ռանդոլ Ռոդոսն ընդգծեց միջազգայնացման կարևորությունը ՀՀ կրթության զարգացման գործում և այդ համատեքստում առանձնացրեց ՀԱՀ զարգացման հիմնական ուղությունները:
Մանկավարժական համալսարանի միջազգային համագործակցության բաժնի ղեկավար Մարիաննա Հարությունյանը ներկայացրեց ծրագրի ընթացքը և հետագա գործողությունները, իսկ բաժնի աշխատակից Ռաիսա Ավետյանն անդրադարձավ բաժնի կողմից միջազգայնացման իրականացման կազմակերպմանը, գործառույթներին և մատուցվող ծառայություններին:
Բուհերի կողմից իրականացվող ծրագրերի ընթացքը և արդյունքները ներկայացրին նաև հայ-ռուսական համալսարանի և Երեվանի Վ․Բրյուսովի անվան պետական լեզվահասարակագիտական համալսարանի ներկայացուցիչները:
ՀՀ կրթության, գիտության, մշակույթի և սպորտի նախարարության ներկայցուցիչ Տաթևիկ Ղարիբյանն ու ակադեմիական փոխճանաչման և շարժունության ազգային տեղեկատվական կենտրոնի տնօրեն Գայանե Հարությունյանը ներկայացրին ՀՀ բուհերի միջազգայնացման ռազմավարության նպատակները և խնդիրները, որոնք մշակվել են ծրագրի իրականացման ընթացքում:
Աշխատաժողովի ընթացքում անդրադարձ եղավ նաև ծրագրի շրջանակներում բուհերի կողմից մշակված շարժունության կանոնակարգերին և մարկետինգային ռազմավարությանը:
Աշխատաժողովն ամփոփեցին ծրագրի եվրոպացի գործընկերնեը, որոնք ներկայացրին միջազգայնացման եվրոպական փորձը։
Նշենք, որ Էրազմուս+ BOOST /Հայաստանյան համալսարանների միջազգայնացման ռազմավարության և մարքեթինգի խթանում/ ծրագրի համակարգողն է Հայկական պետական մանկավարժական համալսարանը:
